धावत्या ट्रेनद्वारे होणार वीज निर्मिती, रेल्वेची भन्नाट आयडिया

मुंबई : रेल्वेने वीज निर्मितीसाठी एक भन्नाट कल्पना आणली आहे. पश्चिम रेल्वेने वाऱ्याचा वीज निर्मिती करण्यासाठी उपयोग करण्याची योजना आखली आहे. अतिशय लहान पवनचक्कीचा वापर करुन वाऱ्याद्वारे ही वीज निर्मिती करण्यात येणार आहे.

लहान पवनचक्की, ज्यांना सूक्ष्म पवन टर्बाइन किंवा लघु-स्तरीय पवन टर्बाइन्स असंही म्हणतात. रेल्वे रुळांवर या पवनचक्की बसवण्यात आल्या असून वाऱ्याच्या ऊर्जेचा उपयोग वीज निर्मिती करण्यासाठी करण्यात येत आहे.


पश्चिम रेल्वेने दोन पवनचक्की नायगाव आणि खार स्थानकांदरम्यान बसवल्या आहेत. रेल्वे धावताना त्याद्वारे निर्माण होणाऱ्या हवेतून पवनचक्कीद्वारे वीज निर्मिती करण्यात येणार आहे. सध्या हा पायलट प्रोजेक्ट म्हणून करण्यात आला आहे. हा प्रोजेक्ट जर यशस्वी झाला, तर रेल्वेकडून अशा मिनी पवनचक्की इतर रेल्वे स्थानकांतही बसवल्या जातील.

काय झाडी, काय डोंगर, काय पर्वत; समृद्धी महामार्गाचा इगतपुरी ते ठाणे टप्पा एकदम ओक्के
हा देशातील अशाप्रकारे रेल्वे ट्रॅकवर पवनचक्की लावून वाऱ्याद्वारे वीज निर्मितीचा पहिलाच प्रकल्प असणार आहे. पर्यावरणाच्या दृष्टीने हा प्रकल्प उत्तम ठरणार असल्याचं या प्रकल्पाचे प्रमुख सुमित ठाकूर यांनी म्हटलं आहे. ज्यावेळी ट्रेन रेल्वे रुळावरुन वेगात जाते, त्यावेळी वाऱ्याचा प्रवाह तयार होता. हा वाऱ्याचा प्रवाह रेल्वे ट्रॅकमध्ये बसवलेल्या मिनी पवनचक्की कॅप्चर करुन त्याद्वारे वीज निर्मिती होण्यास मदत होईल. या मिनी पवनचक्की अशाप्रकारे बसवण्यात आल्या आहेत, ज्यात वेगात असलेल्या ट्रेनद्वारे निर्माण होणारा वारा कोणत्याही दिशेने आल्यास पवनचक्की तो कॅप्चर करू शकेल.

मुंबईकरांसाठी मोठी बातमी! आता सर्व लोकल ट्रेन होणार एसी, प्रवास आणखीनच गारेगार अन् आरामदायी
किती खर्च येईल?

रेल्वे ट्रॅकमध्ये पवनचक्की बसवून वीज निर्मिती करण्यासाठीच्या या प्रकल्पाला जवळपास १० लाख रुपये इतका खर्च येणार आहे. ट्रॅकमध्ये बसवलेल्या पवनचक्कीच्या एका सेटमध्ये ४ Kwp अर्थात किलोवॅट पीक क्षमतेचे पाच टर्बाइन असतील. या सेटमध्ये दोन Wind टर्बाइन आणि दोन सोलर पॅनेल असणार आहेत.