या शहरात माणसाच्या जगण्याची किंमत किती आहे? सर्वसामान्यांच्या जगण्याची किंमत आहे का, असा प्रश्न अनिकेत जाधव यांच्या कुटुंबीयांनी उपस्थित केला. एकोणीस वर्षाचा अनिकेत शिक्षण सांभाळून सेल्समनचे काम करत होता. आर्थिक परिस्थिती बेताची असल्यामुळे शिक्षणासोबत अनुभव मिळावा यासाठी त्याने स्वतःच्या हिंमतीवर नोकरी मिळवली. काल कामानिमित्त फिरतीवर असताना तो हिमालय पुलावरून कोसळला. अवघ्या १९ वर्षाच्या अनिकेतच्या पाठीला जबर मार बसला आहे त्यामुळे त्याला जागेवरून उठताही येत नाही. कोणतीही हालचाल केली की त्याला खूप वेदना होतात. 'हा मुलगा केव्हा बरा होणार, याचं उत्तर कोण देईल?' जाधव कुटुंबीय प्रश्न उपस्थित केला.
वडाळा येथे राहणाऱ्या अनिकेतचे वडील 'बेस्ट'मध्ये इलेक्ट्रिशिअन म्हणून काम करतात. गुरुवारी हिमालय पूल कोसळला तेव्हाही अनिकेत त्यामध्ये असेल, असे त्यांच्या कुटुंबाला वाटले नाही. काकांनी रात्री उशिरा जेव्हा टीव्ही लावला तेव्हा खाली जखमींची जी नावे येत होती त्यामध्ये अनिकेतचेही नाव होते. ते पाहिल्यानंतर थोड्याच वेळात पोलिसांचा फोन आला. तिसऱ्या वर्षाला असलेल्या अनिकेतने दोन महिन्यांपूर्वी घाटकोपर येथे एका कंपनीमध्ये नोकरी मिळवली. त्याला मुंबईच्या वेगवेगळ्या भागांमध्ये उत्पादन विक्रीसाठी जावे लागते. त्याल अनुभवा मिळेल आणि घरी थोडा हातभार लागेल या विचाराने बाबांनी त्याला काम करायला संमती दिली, पण आज मात्र होत्याचे नव्हते झाले. कालपासून वेदनांनी विव्हळत असलेल्याअनिकेतला पाहून त्यांच्या बहिणी अस्वस्थ झाल्या आहेत. त्याला पुन्हा चालता येईल ना, हाच प्रश्न त्या सेंट जॉर्जेस रुग्णालयामध्ये डॉक्टरांनाही विचारत होत्या.