'ईडी'चं विघ्न बाप्पा दूर करेल: मनोहर जोशी

मुंबई: 'गणपती बाप्पा त्यांचंच विघ्न दूर करतो, जे स्वत: स्वच्छ असतात. माझ्या मुलाला मी सगळ्यात जास्त ओळखतो. तो काहीही चुकीचं करणार नाही. त्यामुळं त्यांच्यावरील 'ईडी'चं विघ्न बाप्पा नक्कीच दूर करेल,' असा विश्वास महाराष्ट्राचे माजी मुख्यमंत्री व शिवसेना नेते मनोहर जोशी यांनी आज व्यक्त केला.

मनोहर जोशी यांच्या घरी प्रतिवर्षीप्रमाणे यंदाही गणरायाची प्रतिष्ठापना करण्यात आली. या प्रसंगी एका वृत्तवाहिनीशी बोलताना त्यांनी विविध विषयांवर मनमोकळेपणानं भाष्य केलं. जोशी यांचे पुत्र उन्मेश यांच्यामागे सध्या 'ईडी'च्या चौकशीचा ससेमिरा लागला आहे. त्या संदर्भात बोलताना, चौकशीतून काही निष्पन्न होणार नाही, असं ते म्हणाले.

भुजबळांबद्दल पक्षाचा आदेश शिरसावंद्य

माजी उपमुख्यमंत्री व राष्ट्रवादीचे नेते छगन भुजबळ शिवसेनेत प्रवेश करणार असल्याची सध्या चर्चा आहे. त्या पार्श्वभूमीवर त्यांनी आपलं मत व्यक्त केलं. 'छगन भुजबळ हा काम करणारा माणूस आहे. असा माणूस शिवसेनेत आला तर तो यशस्वी होतो. शिवाय, प्रत्येक माणूस स्वत:चं एक नशिब घेऊन येतो. तसंच भुजबळांचंही आहे. त्यांच्या बाबतीत पक्ष देईल तो आदेश आम्हाला शिरसावंद्य आहे. किंबहुना हा आदेश मानत असेपर्यंतच मी पक्षात आहे याची मला जाणीव आहे, असं सूचक वक्तव्यही त्यांनी केलं.

कुणीही मुख्यमंत्री होऊ शकतो!

आदित्य ठाकरे महाराष्ट्राचे मुख्यमंत्री होऊ शकतात का असं विचारलं असता, 'कुणीही मुख्यमंत्री होऊ शकतो,' असं मनोहर जोशी म्हणाले. 'चार इयत्ता शिकलेले वसंतदादा पाटील मुख्यमंत्री झाले होते हे लक्षात घेतलं पाहिजे,' याकडं त्यांनी लक्ष वेधले.