वांद्रे पूर्व मतदारसंघ शिवसेनेकडे सन २००९ पूर्वी कधीच नव्हता. बाळासाहेबांचे विश्वासू शिवसैनिक व तत्कालीन नगरसेवक प्रकाश ऊर्फ बाळा सावंत यांनी हा मतदारसंघ खेचून आणला होता. त्यानंतर २०१४ मध्ये पुन्हा या मतदारसंघावर सावंत यांनी भगवा फडकवला होता. २०१५ मध्ये त्यांचे निधन झाल्यानंतर त्यांची पत्नी तृप्ती सावंत यांना पोटनिवडणुकीत सेनेने उमेदवारी दिली. काँग्रेसने नारायण राणे यांच्यासारखा बलाढ्य उमेदवार समोर उभा केल्यानंतरही शिवसैनिकांनी एकदिलाने लढून हा मतदारसंघ सेनेकडे कायम ठेवला. त्यामुळे २०१९च्या निवडणुकीत पुन्हा तृप्ती सावंत यांनाच उमेदवारी मिळेल, असा विश्वास शिवसैनिकांना वाटत होता. मात्र सेना नेते अनिल परब यांच्या आग्रहाखातर महापौर विश्वनाथ महाडेश्वर यांना उमेदवारी देण्याची चूक सेना नेतृत्वाने केली. या मतदारसंघात बाळा सावंत यांच्याशी वैयक्तिक स्नेह असलेल्या सर्वधर्मीय मतदारांची संख्या मोठी आहे. सांताक्रूझ येथे राहाणाऱ्या महाडेश्वरांना उमेदवारी दिल्यास फटका बसेल, असा इशारा ज्येष्ठ शिवसैनिकांनी दिला होता. तो नेतृत्वाने मानला नाही. त्याचे परिणाम महाडेश्वर यांच्या पराभवाने चुकवावे लागले.
महापौर का पडले?
वांद्रे पूर्व मतदारसंघ शिवसेनेकडे सन २००९ पूर्वी कधीच नव्हता...
महाराष्ट्र टाइम्स.कॉम 25 Oct 2019, 4:00 am