पोलीस-पत्नीच्या हत्येप्रकरणी मुलावर संशय?

मटा ऑनलाइन वृत्त । मुंबई

मुंबईतील खार पोलीस ठाण्याचे पोलीस निरीक्षक ज्ञानेश्वर गणोरे यांच्या पत्नीची हत्या त्यांच्याच फरार मुलाने केल्याचा संशय पोलिसांना आहे. गणोरे यांची पत्नी दिपाली गणोरे यांच्या हत्येनंतर लादीवर रक्ताने 'आय अॅम टायर्ड ऑफ हर कॅच अँण्ड हँग मी' असा मजकूर लिहिलेला आढळला आहे.

गणोरे यांचा २१ वर्षांचा मुलगा सिद्धान्त नॅशनल कॉलेजमध्ये पदवीच्या पहिल्या वर्षाला शिक्षण घेत होता. दिपाली यांची हत्या झाली तेव्हापासून तो बेपत्ता आहे, त्याचा मोबाइल फोनही बंद आहे. तो फरार झाला असल्याचा पोलिसांना संशय आहे. दरम्यान, दिपाली यांचा मृतदेह कूपर रूग्णालयात शवविच्छेदनासाठी पाठवण्यात आला आहे.

सांताक्रूझ पश्चिम येथील प्रभात कॉलनीत राहणारे गणोरे रात्री ड्युटीवरून घरी गेले तेव्हा त्यांना घराचा दरवाजा बंद असलेला आढळला. त्यामुळे त्यांनी मोबाइलवरून आपल्या पत्नीशी संपर्क करण्याचा प्रयत्न केला. मात्र, फोन लागला नाही. शेवटी त्यांनी स्वत: दरवाजा उघडला असता त्यांना आपली पत्नी दिपाली रक्ताच्या थारोळ्यात पडलेली दिसली. त्यांनी तात्काळ पोलिसांना माहिती दिली. पोलिसांनी तातडीने घटनास्थळी जाऊन परिस्थितीची पाहणी केली. आहे. या प्रकरणी अज्ञातांविरुद्ध गुन्हा नोंदवण्यात आला आहे. सध्या खार पोलीस ठाण्यात ड्युटीवर असणारे गणोरे शीना बोरा हत्या प्रकरणाच्या तपास पथकात आहेत.