'एआयबी'च्या तन्मय भट्टला ठोकून काढूः मनसे

मटा ऑनलाइन वृत्त । मुंबई

मास्टर ब्लास्टर सचिन तेंडुलकर आणि गानसम्राज्ञी लता मंगेशकर या दोन भारतरत्नांवर आक्षेपार्ह टिप्पणी करणाऱ्या 'एआयबी रोस्ट'च्या तन्मय भट्टला ठोकून काढण्याची धमकी महाराष्ट्र नवनिर्माण सेनेने दिली आहे. मनसेच्या चित्रपट सेनेचे अध्यक्ष अमेय खोपकर यांनी तन्मयविरोधात शिवाजी पार्क पोलीस ठाण्यात तक्रार दाखल केली असून त्याच्या अटकेची मागणी केली आहे.

तन्मय भट्टने काही महिन्यांपूर्वी मॉर्फिंग केलेले दोन व्हिडिओ सोशल मीडियावर व्हायरल झालेत. त्यात सचिन तेंडुलकर आणि लतादीदींची टिंगलटवाळी केल्यानं त्यांचे चाहते खवळलेत. सेलिब्रिटींसह हजारो नेटकऱ्यांनी तन्मयवर टीकेची झोड उठवली आहे. मनसेनं तर, तन्मय भट्टने रस्त्यावर उतरून दाखवावं, असा इशारा देऊन आपला संताप व्यक्त केला आहे. अभिव्यक्ती स्वातंत्र्याच्या नावाखाली चाललेला हा हिडीस प्रकार खपवून घेणार नसल्याचंही त्यांनी ठणकावलंय.

सचिन आणि लतादीदी यांच्याशी मनसे अध्यक्ष राज ठाकरे यांचे अत्यंत जिव्हाळ्याचे संबंध आहेत. हे दोघंही मुंबईचीच नव्हे, तर देशाची शान आहेत. स्वाभाविकच, त्यांची टिंगलटवाळी पाहून मनसेची 'सटकली' आहे. दोन भारतरत्नांवर बनवलेल्या भिकार व्हिडिओसाठी विकृत मेंदूच्या माणसाला ठोकूनच काढलं पाहिजे. टुकार तन्मयचं काय करायचं ते आम्ही करूच; पण महाराष्ट्राच्या दोन रत्नांचा अपमान करणारा हा व्हिडिओ कुणीही फोरवर्ड करू नये, असं आवाहनही मनसेनं केलंय.

दरम्यान, अभिनेते अनुपम खेर, रितेश देशमुख, अभिनेत्री सेलिना जेटली यांनीही या व्हिडिओबद्दल तीव्र संताप व्यक्त केला आहे.

'एआयबी'चा वादग्रस्त व्हिडिओः