-जागेसाठी पुन्हा मागवल्या निविदा
-दोन कंपन्यांनी दिला प्रतिसाद
-महिनाअखेरीस होणार कंपनीची निवड
म. टा. विशेष प्रतिनिधी, मुंबई
कास्टिंग यार्डअभावी रखडलेल्या वांद्रे-वर्सोवा सी लिंकचे काम या महिनाअखेरीस मार्गी लागण्याची चिन्हे आहेत. कास्टिंग यार्डअभावी गेली चार महिने काम थांबले आहे. यार्डाच्या जागेसाठी पुन्हा एकदा निविदा मागवण्यात आली असून, यावेळेस दोन कंपन्यांनी प्रतिसाद दिला आहे. या दोनपैकी एका कंपनीची निवड होऊन महिनाअखेरीस कास्टिंग यार्डसाठी जागा उपलब्ध होईल, अशी शक्यता आहे.
महाराष्ट्र राज्य रस्ते विकास महामंडळाने (एमएसआरडीसी) वांद्रे येथील जागा कास्टिंग यार्डसाठी निश्चित केली होती. त्यासाठी तिवरांवर संक्रात येणार होती. त्यामुळे पर्यावरणाचा ऱ्हास होत असल्याचा आक्षेप घेत पर्यावरणवाद्यांनी उच्च न्यायालयात याचिका दाखल केली होती. या याचिकेची दखल घेत न्यायालयाने कास्टिंग यार्डला परवानगी नाकारली. त्यामुळे नव्या जागेचा शोध घेणे क्रमप्राप्त झाले. कास्टिंग यार्डसाठी मोठ्या जागेची आवश्यकता असते. एवढी मोठी जागा या परिसरात उपलब्ध नसल्याने महामंडळापुढे अडचण निर्माण झाली होती. प्रकल्पस्थळाजवळच कास्टिंग यार्ड आवश्यक असते. ओशिवरा भागात यार्डसाठी जागा उपलब्ध होण्याची शक्यता होती. मात्र, ती जागाही दूर अंतरावर होती, शिवाय संबंधित जागेच्या मालकासोबत जागेबाबतची बोलणी यशस्वी होऊ शकली नाहीत.
त्यानंतर जागेसाठी निविदा काढण्यात आली असता, एकच निविदा आली. नियमानुसार एकच निविदा आली तर ती मंजूर करता येत नाही. स्पर्धात्मक वातावरण असावे, वाजवी दर मिळावा म्हणून एकापेक्षा जास्त कंपन्या किंवा कंत्राटदारांनी निविदा भरणे आवश्यक असते. त्यामुळे पुन्हा एकदा निविदा मागवण्यात आली असून, यावेळेस दोन कंपन्यांनी प्रतिसाद दिला आहे. या दोनपैकी एका कंपनीची निवड होऊन महिनाअखेरीस कास्टिंग यार्डसाठी जागा उपलब्ध होईल, अशी शक्यता आहे.
कास्टिंग यार्ड नसल्याने प्रकल्पाचे काम सुरू करता येत नाही. प्रकल्पाची साधन सामग्री, यंत्रसामग्री ठेवण्यासाठी कास्टिंग यार्डचा वापर होतो. यार्ड प्रकल्पस्थळाजवळ असेल तर बांधकाम झपाट्याने होते.