सरकार आमची मुलगी परत देईल काय?

मुंबई : मुंबईची लोकसंख्या वाढतेय, परळ रेल्वे स्टेशनवरची गर्दीही वाढत चालली आहे. प्रवासी त्याच गंजलेल्या, छोट्या पुलावरून ये-जा करतात. सरकारला त्याचे काय पडले आहे. लोक मरोत वा जिवंत राहोत. आमची सोन्यासारखी, हसतीखेळती मुलगी आज याच नाकर्तेपणाचा बळी ठरली. पैसे घेऊन काय करणार, आमची मुलगी आम्हाला परत द्या... ती कुणी देऊ शकणार आहे का? अशी किडामुंगीसारखी माणसे दुर्घटनेमध्ये संपतात, त्यांच्या कुटुंबाची यात किती फरफट होते, याची कल्पनाही सरकार करू शकणार नाही, असा संताप एल्फिन्स्टनच्या चेंगराचेंगरीमध्ये दगावलेल्या हिलोनी देढियाच्या नातलगांनी व्यक्त केला.

घाटकोपर येथे राहणारी हिलोनी एल्फिन्स्टनला अॅक्सिस बँकेत कामाला होती. आज सकाळी नेहमीप्रमाणे ती बँकेत निघाली होती. पुलावार गर्दी असल्याने ती काही वेळ थांबलीही होती. परंतु उशीर होत असल्याने तिने पुढे जायचे ठरवले. त्याचवेळी ही गर्दी बिथरली. त्या गर्दीत ती मधोमध सापडली. तिला रुग्णालयात आणण्यात आले तेव्हा केवळ तिच्या पायाला फ्रॅक्चर होते. ती आम्हाला अशी कशी सोडून जाईन हो, असा आर्त सवाल तिच्या नातेवाईकांनी केला. तिची ओळख पटविण्यासाठी देढिया कुटुंबीय बराच वेळ शवागाराच्या बाहेर उभे होते. हिलोनीच्या मृतदेहाची ओळख पटल्यानंतर या कुटुंबीयांचा व तिच्या मित्रमंडळींचा बांध फुटला. रेल्वे बजेटमध्ये कोट्यवधी रुपयांची आर्थिक तरतूद केली जाते. अमूक स्टेशनच्या विकासाची गाजरे दाखवली जातात. परंतु या पुलांची दुरुस्ती कोण करणार, माणसे मेली की सगळे रुग्णालयांकडे धावत येतात, परंतु ही वेळच येऊ नये याची जबाबदारी कोणी घेत नाही, असा उद्वेग या नातलगांनी व्यक्त केला.