‘हिवाळी अधिवेशनाचा कालावधी वाढवा’

म. टा. प्रतिनिधी, मुंबई

मुंबईत सोमवारपासून सुरू झालेल्या विधिमंडळाच्या हिवाळी अधिवेशनाच्या कामकाजाचा कालावधी वाढविण्यात यावा, अशी आग्रही मागणी विरोधी पक्षांच्या शिष्टमंडळाने राज्यपाल सी. विद्यासागर राव यांची राजभवनात भेट घेऊन केली आहे. दुष्काळाची गंभीर परिस्थिती व अन्य जनहिताच्या प्रश्नावर चर्चा करण्यास पुरेसा वेळ मिळावा यासाठी अधिवेशनाचा कालावधी वाढविण्याबाबत सरकारला निर्देश द्यावेत, अशी मागणी शिष्टमंडळाने यावेळी केली.

हिवाळी अधिवेशनाचा कालावधी ठरवताना सरकारने अवघ्या ९ दिवसांचे वेळापत्रक तयार केले आहे. हा कालावधी विरोधी पक्षांना मान्य नाही. याबाबत कामकाज सल्लागार समितीच्या बैठकीतही विरोधी पक्षनेते राधाकृष्ण विखे पाटील आणि धनंजय मुंडे यांनी हिवाळी अधिवेशनाचा कालावधी एक आठवड्याने वाढविण्याची मागणी केली होती. मात्र सरकारने अवघ्या नऊ दिवसांचे कामकाज निश्चित करून अधिवेशन संपवण्याचा घाट घातला आहे. त्यामुळे आता राज्यपालांनी यात हस्तक्षेप करावा, अशी मागणी दोन्ही विरोधी पक्षनेत्यांच्या नेतृत्वाखालील शिष्टमंडळाने राज्यपालांशी सविस्तर चर्चा करताना केली.