म. टा. खास प्रतिनिधी, मुंबई
पवई तलावाच्या परिसरात मगरीचे उद्यान करण्याचे महापालिकेचे नियोजन मेट्रोच्या कामांमुळे अधांतरी राहिले आहे. मगर उद्यानाची जागा मेट्रोच्या कामांमुळे बाधित होणार असल्याने प्रस्तावित मगरीचे उद्यान तूर्तास लांबणीवर टाकण्यात आले आहे. त्यामुळे या कामाच्या काढण्यात आलेल्या निविदांना पालिकेने स्थगिती दिली आहे.
पवई तलावात परिसरातील निवासी संकुलांमधून सांडपाणी सोडले जाते. काही वाहनचालकांकडून तलावाच्या काठावर वाहनेही धुतली जातात. तसेच अवैध मासेमारीही केली जाते. त्यामुळे येथील मगर, मासे अशा जलचरांच्या जीविताला हानी पोहचून तेथील मगरींची संख्या कमी होत आहे. त्यांची संख्या वाढवून मगरींसाठी अनुकूल आवास करण्यासाठी पालिकेने या परिसरात मगरीचे उद्यान बांधण्याचे निश्चित केले होते. सांडपाणी सोडण्यास व मासेमारी करण्यावर बंदी घालून मुंबईत पहिले मगरीचे उद्यान व पर्यटन विकसित केल्यास मुंबईच्या सौंदर्यात भर पडेल, अशी ठरावाची सूचना काँग्रेसचे तत्कालीन नगरसेवक प्रवीण छेडा यांनी मांडली होती. या सूचनेवर पालिका आयुक्तांनी सकारात्मक निर्णय घेत पवई तलावाचे संवर्धन करण्याचे ठरवले.
तलाव स्वच्छतेसाठी होता प्रयत्न
तलावाच्या पाण्याची गुणवत्ता वाढवण्याच्या दृष्टीने एरिशन व डिओ मोनेटरिंग सिस्टीम बसवून पवई तलावात येणारे सांडपाणी वळवण्यासाठी पाणी पुरवठा व मलनि:सारण प्रकल्प खात्यामार्फत निविदाही मागवण्यात आल्या. हे काम फेब्रुवारी, २०१८पर्यंत सुरू होणार होते. मात्र ही कामे प्रस्तावित मुंबई मेट्रो-६च्या कामांमुळे बाधित होणार असल्याने निविदा स्थगित कराव्या लागल्या असल्याचे प्रशासनाने बुधवारी स्थायी समितीत स्पष्ट केले. तलावातील जाळ्या लावून होणाऱ्या अवैध मासेमारीवर बंदी घालावी, तलावात सोडण्यात येणारे सांडपाणी, नादुरुस्त झडपा दुरुस्ती करण्यात याव्यात अशी मागणी नगरसेवकांनी केली. या बाबींकडे लक्ष दिले जाईल, असे प्रशासनाने स्पष्ट केले आहे.
पवई तलावाच्या परिसरात मगरीचे उद्यान करण्याचे महापालिकेचे नियोजन मेट्रोच्या कामांमुळे अधांतरी राहिले आहे. मगर उद्यानाची जागा मेट्रोच्या कामांमुळे बाधित होणार असल्याने प्रस्तावित मगरीचे उद्यान तूर्तास लांबणीवर टाकण्यात आले आहे. त्यामुळे या कामाच्या काढण्यात आलेल्या निविदांना पालिकेने स्थगिती दिली आहे.
पवई तलावात परिसरातील निवासी संकुलांमधून सांडपाणी सोडले जाते. काही वाहनचालकांकडून तलावाच्या काठावर वाहनेही धुतली जातात. तसेच अवैध मासेमारीही केली जाते. त्यामुळे येथील मगर, मासे अशा जलचरांच्या जीविताला हानी पोहचून तेथील मगरींची संख्या कमी होत आहे. त्यांची संख्या वाढवून मगरींसाठी अनुकूल आवास करण्यासाठी पालिकेने या परिसरात मगरीचे उद्यान बांधण्याचे निश्चित केले होते. सांडपाणी सोडण्यास व मासेमारी करण्यावर बंदी घालून मुंबईत पहिले मगरीचे उद्यान व पर्यटन विकसित केल्यास मुंबईच्या सौंदर्यात भर पडेल, अशी ठरावाची सूचना काँग्रेसचे तत्कालीन नगरसेवक प्रवीण छेडा यांनी मांडली होती. या सूचनेवर पालिका आयुक्तांनी सकारात्मक निर्णय घेत पवई तलावाचे संवर्धन करण्याचे ठरवले.
तलाव स्वच्छतेसाठी होता प्रयत्न
तलावाच्या पाण्याची गुणवत्ता वाढवण्याच्या दृष्टीने एरिशन व डिओ मोनेटरिंग सिस्टीम बसवून पवई तलावात येणारे सांडपाणी वळवण्यासाठी पाणी पुरवठा व मलनि:सारण प्रकल्प खात्यामार्फत निविदाही मागवण्यात आल्या. हे काम फेब्रुवारी, २०१८पर्यंत सुरू होणार होते. मात्र ही कामे प्रस्तावित मुंबई मेट्रो-६च्या कामांमुळे बाधित होणार असल्याने निविदा स्थगित कराव्या लागल्या असल्याचे प्रशासनाने बुधवारी स्थायी समितीत स्पष्ट केले. तलावातील जाळ्या लावून होणाऱ्या अवैध मासेमारीवर बंदी घालावी, तलावात सोडण्यात येणारे सांडपाणी, नादुरुस्त झडपा दुरुस्ती करण्यात याव्यात अशी मागणी नगरसेवकांनी केली. या बाबींकडे लक्ष दिले जाईल, असे प्रशासनाने स्पष्ट केले आहे.