​ शाळेने दत्तक घेतले १०० विद्यार्थी!

वरळीच्या मराठा हायस्कूलचा उपक्रम

म. टा. प्रतिनिधी, मुंबई

मुंबईसह राज्यातील मराठी शाळांची स्थिती हा चिंतेचा विषय असून ही परिस्थिती बदलण्यासाठी शाळाच पुढे येऊ लागल्या आहेत. असाच एक आगळा प्रयोग करून वरळीच्या मराठा हायस्कूलने इतरांसमोर आदर्श उभा केला आहे. शाळेने आजूबाजूच्या १०० गरीब मुलांना दत्तक घेऊन त्यांच्या शिक्षणाचा खर्च उचलण्याचा निर्णय घेतला आहे. त्यामुळे शाळेला मराठी माध्यमाच्या वर्गाची पटसंख्या स्थिर ठेवण्यात ही यश आले असून मराठी माध्यमांच्या वर्गाला नवसंजीवनी मिळणार आहे. या निर्णयात शाळेचे पदाधिकारी आणि शिक्षकांचा मोठा सहभाग आहे.

राज्यातील मराठी शाळांसाठी जनआंदोलन उभाण्याची गरज असल्याचे मत वारंवार व्यक्त केले जात होते. याच पार्श्वभूमीवर वरळी येथील मराठा हायस्कूल पुढे सरसावले आहे. या शाळेतर्फे मराठी माध्यमातील १०० गरीब मुलांना गणवेश, मोफत पुस्तके नुकतीच वाटण्यात आली असून त्यांना संगणकीय प्रशिक्षणही मोफत देण्यात येणार आहे. या मुलांसाठी मोफत बससेवाही पुरविली जाणार आहे. विद्यार्थ्यांची शैक्षणिक क्षमता वाढविण्यासाठी शाळेने टाटा एजचा उपक्रम राबविण्याचे निश्चित केले आहे. मुलांचे इंग्रजी सुधारावे यासाठी पहिलीपासूनच इंग्रजीचे अतिरिक्त प्रशिक्षण सुरू करण्याचा निर्णयही शाळेने घेतला आहे. त्यासाठी स्वतंत्र शिक्षकाची नियुक्ती करण्यात येईल अशी माहिती संस्थेचे सचिव पी. एस. गुजर यांनी दिली.

सहकार तत्त्वावर सुरू झालेली मुंबईतील ही पहिलीच शाळा असून डॉ. बाबासाहेब आंबेडकर हे आमच्या शाळेचे विद्यार्थी होते. गरीब आणि आर्थिक मागास असणाऱ्या मुलांसाठीच ही शाळा १८८६ साली राजारामशात्री भागवत यांनी सुरू केली असून तेच तत्त्व आम्ही पुढे नेत आहोत. शाळेचे संपूर्ण नूतनीकरण करून अत्याधुनिक सुविधा मुलांना उपलब्ध करून दिल्या जात आहेत.

- डी. एस. कदम, अध्यक्ष, मराठा सहकारी शिक्षण विकास समूह