मनी लॉन्ड्रिंगसाठी १०० कंपन्या स्थापन; पत्नीला 'गिफ्ट' म्हणून ८७ कोटी दिले

मुंबई: येस बँक घोटाळ्यातील धक्कादायक माहिती समोर येऊ लागली आहे. येस बँकेचे संस्थापक राणा कपूर आणि त्यांच्या कुटुंबीयांनी १००हून अधिक छोट्या छोट्या कंपन्या तयार करून पैसा ट्रान्सफर केला आहे. राणा कपूरने तर त्याच्या पत्नीच्या मालकीच्या कंपनीला ८७ कोटी रुपये गिफ्ट म्हणून दिल्याची धक्कादायक माहिती उघड झाली असून ईडीने या घोटाळ्याची पाळंमुळं खणून काढली आहेत.

दिवाळखोरीत निघालेला डिएचएफएल ग्रुप आणि येस बँक दरम्यान २०१८मध्ये झालेल्या व्यवहाराच्या मनी लॉन्ड्रिंग प्रकरणाची चौकशी ईडीने सुरू केली आहे. या चौकशीत ५०५० कोटीची मनी लॉन्ड्रिंग झाल्याचं उघड झालं आहे. हा पैसा आणि निधी हस्तांतरीत करण्यासाठी कपूर फॅमिलीशी संबंधित कंपन्यांचा वापर करण्यात आल्याचंही उघड झालं आहे.

ठाकरे सरकारचं 'चलान' फाटणार का?; गडकरी म्हणाले...

येस बँक घोटाळ्याबाबत सध्या विशेष पीएमएलए कोर्टात सुनावणी सुरू आहे. या चौकशीत १०० हून अधिक कंपन्या या कपूर फॅमिलीच्या मालकीच्या असल्याचं उघड झालं आहे. या सर्व फर्ममध्ये राणा कपूरही मॅनेजर होते. या सर्व कंपन्यांचा निधीचा वापर करण्यासाठी आणि मनी लॉन्ड्रिंगसाठी वापर केला जात होता. या सर्व फर्म रिअल इस्टेट, फॅशन आणि ईको टुरिझमशी संबंधित आहेत, अशी माहिती ईडीने पीएमएलए कोर्टाला दिली.

श्रमिक रेल्वेत ८० जणांनी घेतला अखेरचा श्वास!

या कंपन्यांमध्ये आरएबी इंटरप्रायझेस, मॉर्गन क्रेडिट्स प्रायव्हेट लिमिटेड, DOIT अर्बन वेंचर्स प्रायव्हेट लिमिटेडचा समावेश आहे. ईडीच्या चार्जशीटमध्येही या कंपन्यांची नावं आहेत. आरएबी इंटरप्रायझेस राणा कपूरची पत्नी बिंदूच्या मालकीची आहे. त्यांच्याकडे उत्पन्नाचा कोणताही दुसरा स्त्रोत नाही. तरीही राणाने बिंदूच्या कंपनीला ८७ कोटी रुपये दिले. राणाने गिफ्ट म्हणून ही रक्कम दिल्याचा दावा ईडीने केला आहे.