म.टा. विशेष प्रतिनिधी, नागपूर
भाजपचे असंतुष्ट ज्येष्ठ नेते एकनाथ खडसे यांनी राष्ट्रवादी काँग्रेसचे सर्वेसर्वा शरद पवार यांची गुरुवारी सकाळी अखेर भेट घेऊन सुमारे तासभर चर्चा केली. या पार्श्वभूमीवर खडसे केव्हा 'घड्याळ' बांधणार, अशी चर्चा नव्याने सुरू झाली आहे.
एकनाथ खडसे यांची नाराजी उघड असून राष्ट्रवादी काँग्रेसमध्ये ते प्रवेश करणार असल्याची चर्चा काही दिवसांपासून सुरू आहे. 'माझा काही भरवसा नाही. मी कधीही भाजप सोडू शकतो', असे वक्तव्य करून त्यांनी गेल्या आठवड्यात खळबळ उडवून दिली. त्यातून राष्ट्रवादीच्या प्रवेशाचा मुहूर्त केव्हा निघतो, याकडे राजकीय वर्तुळाचे लक्ष लागले होते.
शरद पवार यांचे तीन दिवसांच्या नागपूर दौऱ्यावर मंगळवारी आगमन होताच त्यापाठोपाठ काही तासांतच एकनाथ खडसे उपराजधानीत आले. आगमनानंतर त्यांनी एका मंत्र्यांची भेट घेतली. बुधवारीच ते राष्ट्रवादीत प्रवेश करणार असल्याची चर्चा उफाळून आली. मात्र, त्यांनी ही शक्यता फेटाळून लावली. 'मी भाजपचाच कार्यकर्ता असून, कुठल्याही पक्षात जाणार नाही. त्यामुळे माझी मनधरणी करण्याचा प्रश्नच उद्भवत नाही', असे त्यांनी माध्यमांशी बुधवारी बोलताना स्पष्ट केले.
खडसे यांनी गुरुवारी सकाळी वर्धा रोडवरील एका हॉटेलमध्ये पवार यांची घेतलेली भेट अतिशय गुप्त ठेवण्यात आली. त्यामुळे भेटीत नेमकी कोणती चर्चा झाली, याची माहिती बाहेर आलेली नाही. यापुढे त्यांची भूमिका कशी राहणार, याकडे सर्वांचे लक्ष लागले आहे. या भेटीनंतर खडसे यांचा भ्रमणध्वनी 'नॉट रिचेबल' झाला.