'अनुपम आयाम'मध्ये अनुप कुमार यांनी व्यक्त केल्या भावना
म. टा. प्रतिनिधी, नागपूर
'मैं जाऊँगा कहीं भी लौटूंगा यहीं, यही तो घर है मेरा...' असे म्हणत प्रशासकीय कामकाजानिमित्त कुठेही गेलो तरी मनाने नागपूरकरांच्या हृदयात कायम घर करून राहील, अशा शब्दांत माजी विभागीय आयुक्त अनुप कुमार यांनी आपल्या भावना व्यक्त केल्या. वसंतराव नाईक सभागृह वनामती येथे राष्ट्रभाषा परिवार व मिराकी थिएटर यांच्या संयुक्त विद्यमाने 'अनुपम आयाम' कार्यक्रमाचे आयोजन करण्यात आले होते. यावेळी अनुप कुमार यांची मुलाखत घेण्यात आली. यावेळी ते बोलत होते.
यावेळी काव्यनाट्य, काव्यवाचन आणि अनुप कुमार यांनी रचलेल्या काही कविता सादर करण्यात आल्या. अजय गंपावार तसेच नागपूर विद्यापीठातील हिंदी विभागाच्या प्रमुख डॉ. वीणा दाढे यांनी यावेळी अनुप कुमार यांच्याशी संवाद साधला. यावेळी अनुप कुमार यांनी प्रशासकीय कामकाजात असलेला कवी नेमके काय शोधतो, हे उलगडण्याचा प्रयत्न केला.
ते म्हणाले की, 'कविता लिहिणे ही माझी खाजगी आणि आंतरिक गरज आहे. प्रशासकीय कामकाजात येणारे अनुभव इतरांच्या कामी यावेत, या उद्देशाने त्यांनी अशा प्रसंगांना कवितांची जोड दिली. त्यामुळेच त्यांच्या कविता या अनुभवजन्य ठरल्या. ज्या लोकांपर्यंत प्रशासन म्हणून आपण पोहोचू शकत नाही, त्यांच्यापर्यंत आपल्याला पोहोचता आले पाहिजे, ही जाणीव करून देते. त्यामुळे प्रशासकीय सेवेत कविता हा छंद म्हणून जोपासला असला तरी ती गरज बनली आहे.' यावेळी अनुप कुमार यांनी स्व-रचित कवितांचे वाचन केले. यावेळी त्यांनी आपल्या 'हरी काई वाली झील...' 'बंडू गेडाम की जिप्सी..., केसरबाई भोतमांगे का शहर..., तबाही..., 'सावली हवी..., बसंत खोजती चिडीया..., खोजती है चेन्ना मटामी की माँ..., सपने मरे नहीं है अब तक वे है वही दफन, वे अखवा आयेंगे, थोडी सी नई पाकर, सपने मरे नहीं है अब तक...' आदी कविता सादर केल्या. यावेळी राष्ट्रभाषा परिवाराच्या वतीने प्रधान सचिव अनुप कुमार यांचा शाल, श्रीफळ व स्मृतिचिन्ह देऊन सत्कार करण्यात आला. श्वेता शेलगावकर यांनी या कार्यक्रमाचे संचालन केले.