छत्तिसगड: १५ माओवादी ठार; दोन जवान शहीद

महेश तिवारी, गडचिरोली

छत्तीसगडच्या सुकमा जिल्ह्यातील माओवाद्यांचा बालेकिल्ला असलेल्या तोंडेमरकाच्या जंगलात सुरक्षा दलांनी शनिवारी मोठी मोहीम राबवून पंधरापेक्षा जास्त माओवाद्यांना ठार मारल्याचा दावा शनिवारी छत्तीसगड पोलिसांनी केला आहे. यावेळी झालेल्या चकमकीत दोन जवान शहीद तर पाच जवान जखमी झाले आहेत. या अभियानाला ‘ऑपरेशन प्रहार’ असे नाव देण्यात आले होते.

सुकमा जिल्ह्यात कारवायांचा सूत्रधार माओवाद्यांच्या मिलिटरी दलमचा कमांडर हिडमा हा आहे. एका आठवड्यापासून या भागात माओवाद्याच्या हालचाली वाढल्या आहेत. थेट ओडिशातून काही माओवादी येथे दाखल झाले असून, दोनशेपेक्षा जास्त माओवाद्यांचे ‘लोकेशन’ पोलिसांना कळाले. शनिवारी सकाळी पोलिस आणि सीआरपीएफच्या नेतृत्वाखाली संयुक्त कारवाई सुरू झाली. पोलिस, सीआरपीएफ, कोब्रा बटालियन तसेच विशेष पथकाचे हजारपेक्षा जास्त जवान या भागात शिरले. सकाळी ९ वाजताच्या सुमारास चकमक सुरू झाली. यात छत्तीसगड पोलिसांच्या विशेष पथकाचे पाच जवान गंभीर जखमी झाले. या जवानांना घटनास्थळावरून बाहेर काढून नंतर हेलिकॉप्टरने रायपूरला हलविण्यात आले. दरम्यान, घटनास्थळाहून परत येणाऱ्या जवानांच्या एका तुकडीवर माओवाद्यांनी गोळीबार केला असता, त्यात दोन जवान शहीद झाले. घटनास्थळी सुरक्षा दलांना एका माओवाद्याचा मृतदेह सापडला आहे.