सातव्या वेतन आयोगाची थकबाकी मिळणार; महापालिका कर्मचाऱ्यांना भेट

नागपूर : सातवा वेतन आयोग लागू होऊनही त्याअंतर्गत प्रलंबित असलेली १६ महिन्यांची थकबाकी नागपूर महापालिकेच्या कर्मचाऱ्यांना दिवाळीच्या तोंडावर मिळणार असल्याने मोठा दिलासा मिळणार आहे. ही थकबाकी दोन टप्प्यांत मिळणार आहे.

गेल्यावर्षी १६ महिन्यांच्या थकबातीतील एक हफ्ता १३ विभागांच्या कर्मचाऱ्यांना मिळाला होता. त्यामुळे संबंधित कर्मचाऱ्यांना उर्वरीत एक हफ्ता मिळणार आहे. तसेच डीएमध्येही ३ टक्के वाढ करण्यात आली आहे. दोन महिन्यांपूर्वी ही वाढ लागू करण्यात आली होती. मात्र, संबंधित डीएची ७ महिन्यांची थकबाकी अद्याप मिळालेली नाही. दरम्यान आता ही थकबाकी देण्याचा निर्णय घेण्यात आला आहे.

यासंदर्भात महापालिका आयुक्त राधाकृष्णन बी. यांनी आदेश दिल्यानंतर महापालिकेच्या वित्त विभागाने ७ ऑक्टोबरला पत्र काढत १ सप्टेंबर २०१९ ते ३१ डिसेंबर २०२० अशी १६ महिन्यांच्या सातव्या वेतन आयोगाची थकबाकी देण्याचे पत्रात नमूद केले आहे. राज्यातील कर्मचाऱ्यांना १ जानेवारी २०१६ रोजी सातवा वेतन आयोग लागू झाला होता. नागपूर महापालिकेत ८ जानेवारी २०२१ रोजी वित्त विभागाकडून वेतन आयोग लागू करण्यासंदर्भात परिपत्रक जारी करण्यात आले. या परिपत्रकात १ सप्टेंबर २०१९पासून लागू केला जाईल, असे स्पष्ट करण्यात आले होते. दरम्यान ते लागू न झाल्याने कर्मचाऱ्यांनी त्याबद्दल नाराजी व्यक्त करत वेळोवेळी आंदोलनही केले होते. आता दिवाळीच्या आधी ही थकबाकी मिळणार असल्याने कर्मचाऱ्यांची दिवाळी आनंदात जाणार आहे.