म. टा. प्रतिनिधी, नागपूर
महापालिकेच्या प्रभाक क्रमांक १२ (ड)च्या पोटनिवडणुकीत गुरुवारी ३८.०९ इतके मतदान झाले. दिवसभरात २१ हजार १५१ मतदारांनी हक्क बजावला. काँग्रेस व भाजपच्या दृष्टीने ही निवडणूक अत्यंत प्रतिष्ठेची मानली जात आहे. १० जानेवारीला सकाळी १० वाजेपासून धरमपेठ झोन कार्यालयात मतमोजणीस सुरुवात होणार असून आठ टेबलवर सात फेरीत मतमोजणी होणार आहे.
भाजपचे नगरसेवक जगदीश ग्वालबंशी यांच्या अकाली निधनामुळे ही पोटनिवडणूक घेण्यात आली. या निवडणूकीत पाच उमेदवार रिंगणात होते. यात अपक्ष अशोक डोर्लीकर, भारिप-बहुजन महासंघाचे प्रफुल्ल गणवीर, भाजपचे विक्रम ग्वालबंशी, आपचे आकाश कावळे आणि काँग्रेस पंकज शुक्ला यांचा समावेश आहे.
दरम्यान, गुरुवारी शांततेत ही निवडणूक पार पडली. सकाळच्या पहिल्या दोन तासांच्या सत्रात केवळ ३.५३ टक्के मतदान झाले होते. दिवसभरातही याच गतीने मतदान सुरू होते. या वॉर्डमध्ये ३० हजार २३५ पुरुष, तर २७ हजार ९२७ महिला मतदारांची संख्या आहे. यातील ११ हजार ९४८ पुरुष, तर १० हजार २०३ महिला मतदारांनी मतदानाचा हक्क बजावला. मतदानासाठी महापालिका प्रशासनातर्फे ५० पोलिंग बुथची व्यवस्था करण्यात आली होती.
भाजपने येथे दिवंगत जगदीश ग्वालबंशी यांच्या पुत्राला उमेदवारी दिली. काँग्रेसकडून माजी नगरसेवक दाम्पत्य सुरेंद्र व नीलिमा शुक्ला यांचे पुत्र पंकज शुक्ला यांना निवडणुकीच्या रिंगणात उतरविले होते. राष्ट्रवादी काँग्रेस आणि शिवसेने मात्र उमेदवार दिलेला नव्हता.