नवोदय बँक घोटाळा; झामसह दोघांची कसून चौकशी
म.टा. प्रतिनिधी, नागपूर
धंतोलीतील नवोदय अर्बन को-ऑपरेटिव्ह बँकेतील ३९ कोटींच्या घोटाळा प्रकरणात आणखी पंधराजण आर्थिक गुन्हेशाखेच्या रडारवर आले आहेत. यात शहरातील काही बिल्डरांचाही समावेश असून, ठोस पुरावे गोळा होताच लवकरच त्यांची झाडाझडती घेण्यात येणार असल्याची माहिती आहे. या घोटाळा प्रकरणात अटकेतील बिल्डर हेमंत सिकंदर झाम व यौवन जीवनदास गंभीर या दोघांची सोमवारी पोलिसांनी कसून चौकशी केली. या घोटाळ्यात झाम याला कोणी-कोणी मदत केली, याची माहिती पोलिसांनी घेतली. झाम व गंभीर दोघेही १९ सप्टेंबरपर्यंत पोलिस कोठडीत आहेत.
बँकेचे तत्कालीन अध्यक्ष व माजी आमदार अशोक धवड, मुख्य कार्यकारी अधिकारी संजय नाईक यांनी आर्थिक निर्बंध असतानाही मे २०१७मध्ये झाम बिडर्ल्स व डेव्हलपर्सचा संचालक हेमंत झाम याच्यासोबत नियमबाह्य बैठक घेतली. ३८ ठेवीदारांच्या जमा असलेल्या सहा कोटी ७५ लाख रुपयांमधून दोन कोटी ७० लाख रुपयांचा धनादेश हेमंत झामला देण्यात आला. याचा करार केवळ साध्या कागदारवर करण्यात आला. झाम याने पंजाब नॅशनल बँकेत नवीन खाते उघडून हा धनादेश वटविला. काँग्रेसचे नेते माजी आमदार अशोक धवड बँकेचे अध्यक्ष असताना २०१० ते २०१५ या कालावधीत बँकेचे तत्कालीन संचालक मंडळ, पदाधिकाऱ्यांनी बँकेच्या ठराविक कर्जदारांना नियम डावलून कर्ज दिले. या कालावधीत ३८ कोटी ७५ लाख २० हजार ६४१ रुपयांचा घोटाळा झाल्याचे उघड झाल्यानंतर आर्थिक गुन्हेशाखा पोलिसांनी धवड यांच्यासह १५ जणांविरुद्ध गुन्हा दाखल केला. या घोटाळा प्रकरणात पोलिसांनी आतापर्यंत हार्ड डिस्क, सर्व्हर, पासपोर्ट व ११५ फायली जप्त केल्या. तसेच धवड यांच्या मालकीच्या ५३ एकर जागेचे दस्तऐवज ताब्यात घेतले. गुन्हा दाखल झालेल्या सर्वच आरोपींविरुद्ध लूकआउट नोटीस जारी केली. यापूर्वी पोलिसांनी प्रसाद पिंपळे, राजेश बांते व राजेश बोगुल या तिघांना अटक केली आहे.