फेसबुकवर पोस्ट टाकणे भोवले
म.टा. प्रतिनिधी, नागपूर
अमेरिकेत उच्चशिक्षण घेण्यासाठी प्रमाणपत्र मिळवून देण्याचे आमिष दाखवून अभियंता तरुणीला आठ लाख रुपयांचा गंडा घालण्यात आला.
सानिया राजीव गांधी (वय २६ रा. योगेंद्रनगर) या तरुणीने दिलेल्या तक्रारीवरून गिट्टीखदान पोलिसांनी ग्रेक जॉनसन रे (रा. अमेरिका) याच्याविरुद्ध गुन्हा दाखल केला आहे. पोलिसांकडून मिळालेल्या माहितीनुसार, सानिया ही हैदराबादेतील एका कंपनीत अभियंता आहे. तिला अमेरिकेत उच्चशिक्षण घ्यायचे होते. यासाठी तिला 'आयईएलटीएस' प्रमाणपत्राची गरज होती. २१ ऑगस्ट २०१९ रोजी तिने फेसबुकवर याबाबत मेसेज पोस्ट केला. तो बघून अमेरिकेतील ग्रेक जॉनसन रे याने सानियासोबत संपर्क साधला. अमेरिकेत मोठ्या पदावर कार्यरत असल्याचे सांगून प्रमाणपत्र मिळवून देण्याचे आमिष ग्रेक याने सानियाला दाखविले. त्यानंतर तो सानियाच्या व्हॉट्सअॅपवर संपर्क साधायला लागला. यादरम्यान त्याने सानियाचे छायाचित्र व पोसपोर्टची छायांकित प्रतही व्हॉट्सअॅपद्वारे मागविली. प्रमाणपत्रासाठी पैसे लागतील, असे सांगून त्याने भारतातील बँक खात्याचा क्रमांक दिला. सानियाने याबाबत त्याला विचारणा केली. भारतातही आमची शाखा असून, त्याचेच हे खाते क्रमांक असल्याचे ग्रेक याने सानियाला सांगितले. सानियाने वेळोवेळी ग्रेक याने दिलेल्या बँक खात्यात आठ लाख २३ हजार रुपये जमा केले. मात्र, तिला प्रमाणपत्र मिळाले नाही. तिने ग्रेकच्या मोबाइलवर संपर्क साधला असता तो बंद होता. फसवणूक झाल्याचे लक्षात येताच सानियाने गिट्टीखदान पोलिसांत तक्रार दिली. पोलिस उपनिरीक्षक साजिद अहमद यांनी फसवणुकीसह विविध कलमान्वये ग्रेक याच्याविरुद्ध गुन्हा दाखल केला.