मिहानमध्ये होता नोकरीला
नागपूर : जन्मठेपेची शिक्षा झाल्यानंतर पॅरोलवर कारागृहाबाहेर आल्यानंतर फरार होऊन मिहानमध्ये नोकरी करणाऱ्या कैद्याला हिंगणा पोलिसांनी अटक केली आहे. कमलेश मोतीराम राठोड (वय ३९,रा. खापरी पुर्नवसन),असे अटकेतील कैद्याचे नाव आहे. तो सचिन रामदास वरगट या नावाने काम करीत होता.
राठोडला खूनप्रकरणात जन्मठेपेची शिक्षा झाली. २०११ मध्ये पॅरोलवर तो कारागृहातून बाहेर आला. रजा संपल्यानंतर तो कारागृहात न परतता फरार झाला. यादरम्यान त्याने नाव बदलले. तो मिहानमधील एक्झावेअर टेक्नॉलॉजी कंपनीत फायर मार्शल म्हणून काम करायला लागला. यादरम्यान त्याने सुनीता नावाच्या तरुणीसोबत लग्न केले. त्याला चार वर्षांचा मुलगा आहे. कारागृहातून फरार झालेला कैदी मिहानमध्ये काम करीत असल्याची माहिती हिंगणा पोलिसांना मिळाली. पोलिस उपायुक्त विवेक मासाळ, सहायक पोलिस आयुक्त सिद्धार्थ शिंदे यांच्या मार्गदर्शनाखाली वरिष्ठ पोलिस निरीक्षक मारेश्वर बारापात्रे, निरीक्षक अरुण सुगावकर, सहायक पोलिस उपनिरीक्षक सुनील भांडेगावकर, हेडकॉन्स्टेबल विनोद कांबळे, शिपाई विशाल भैसारे, नीलेश वासनकर व विनोद यांनी गुप्त माहितीच्या आधारे सापळा रचून राठोडला अटक केली.
.............