म.टा. प्रतिनिधी, नागपूर
पावसाळी अधिवेशनाचा दुसरा आठवडा सुरू असून अद्यापही काही मंत्र्यांनी विधिमंडळात आगमन झालेले नाही. मंत्र्यांच्या अनुपस्थितीवरून सरकार किती गंभीर आहे, असा उपरोधिक टोला हाणत आता विरोधकांनी टीका करण्यास सुरुवात केली आहे. मंगळवारी मंत्र्यांच्या अनुपस्थितीचा मुद्दा माजी उपमुख्यमंत्री अजित पवार यांनी उपस्थित केला.
अनुपस्थित असणाऱ्या मंत्र्यांमध्ये प्रामुख्याने राज्याचे आरोग्यमंत्री डॉ. दीपक सावंत, महिला व बालकल्याण मंत्री पंकजा मुंडे यांचा समावेश होता. सकाळी सभागृहाचे कामकाज सुरू होण्यापूर्वी पवार यांनी मंत्र्यांच्या अनुपस्थितीचा मुद्दा उपस्थित करून जोरदार प्रहार केला. प्रत्यक्ष नाव न घेता त्यांनी सावंत आणि मुंडे यांच्यावर निशाणा साधला. मुख्य म्हणजे पवारांच्या टीकेला तीन तास लोटत नाही तोच पंकजा मुंडे यांचे आगमन झाले. विरोधकांनी उपस्थित केलेल्या मुद्यानंतर मुंडेंची झालेली एन्ट्री विधानभवन परिसरात चर्चेचा मुद्दा ठरली. परंतु, अद्याप डॉ. सावंत का आलेले नाहीत, याबाबत उलटसुलट चर्चांना उधाण आले होते. विधानपरिषदेवर त्यांना उमेदवारी न मिळाल्याने ते नाराज असल्याचे बोलले जात असूल त्यांनी मंत्रिपदाचा राजीनामाही देऊ केल्याचीही चर्चा आहे. काही दिवसांपूर्वी झालेल्या विधानपरिषदेच्या निवडणुकीत शिवसेनेने डॉ. दीपक सावंत यांना डावलून विलास पोतनीस यांना उमेदवारी दिली गेली. मुंबई पदवीधर मतदारसंघातून गेल्या १८ वर्षांपासून डॉ. सावंत निवडून येत होते. यावर्षी मात्र शिवसेनेने त्यांच्याऐवजी विलास पोतनीस यांना उमेदवारी दिली. आरोग्यमंत्री असल्याने आपल्यालाच उमेदवारी मिळेल, असा विश्‍वास डॉ. सावंत यांना होता. पोतनीस यांना उमेदवारी जाहीर झाल्याबरोबर डॉ. सावंत यांनी मंत्रिपदाचा राजीनामा मुख्यमंत्री देवेंद्र फडणवीस यांच्याकडे सोपविला. परंतु, मुख्यमंत्र्यांनी त्यांचा राजीनामा मात्र अद्यापही स्वीकारला नाही. एवढेच नव्हे तर आपण मंत्रिमंडळाच्या बैठकींना हजर राहा, असा सल्लाही मुख्यमंत्र्यांनी दिल्याचे सांगण्यात येत आहे. पावसाळी अधिवेशन सुरू झाल्यानंतर पहिल्या आठवड्यात ते काही दिवस दिसले परंतु, गेल्या दोन दिवसांपासून ते दिसेनासे झालेत. यामुळे आरोग्य विभागाशी संबंधित कुठलाही प्रश्न असल्यास कोण उत्तर देणार, असा प्रश्न निर्माण झाला आहे.