गुन्ह्यातील आरोपींच्या कारला अपघात
चालकाचा मृत्यू,चट्टेसह दोघे जखमी
लोगो : देना बँकेची फसवणूक
म. टा. प्रतिनिधी, नागपूर
देना बँकेची फसवणूक केल्याचा गुन्हा दाखल होताच नागपुरात फरार होण्याच्या प्रयत्नात असलेल्या आरोपींच्या कारला मध्य प्रदेशातील जबलपूरजवळ भीषण अपघात झाल्याची धक्कादायक माहिती समोर आली आहे. या अपघातात चालकाचा जागीच मृत्यू झाला तर गुन्हा दाखल असलेले दोघे गंभीर जखमी आहेत. जखमींवर जबलपूरमधील हॉस्पिटलमध्ये उपचार सुरू आहेत. माँ अनुसया ट्रेडिंग कंपनीचा संचालक समीर भास्कर चट्टे व दिलीप मोरेश्वर कलेले, अशी जखमींची नावे आहेत. गुन्हे शाखेचे उपायुक्त संभाजी कदम यांनी या वृत्ताला दुजोरा दिला आहे.
खुर्च्यांच्या व्यापारासाठी देना बँकेतून दोन कोटी रुपयांचे कर्ज काढून ही रक्कम परस्पर नातेवाइकांच्या नावे असलेल्या फर्ममध्ये वळती करून बँकेची फसवणूक केल्याप्रकरणी पोलिसांनी सोमवारी समीर भास्कर चट्टे, दिलीप मोरेश्वर कलेले, जामिनदार अनिता अरूण नागभीडकर, अरुण नागभीडकर, मेसर्स आदिनाथ इण्डस्ट्रीज अॅण्ड ट्रेडिंगचे संचालक मेहुल रजनिकांत धुवाविया व समीर चट्टेची वहिणी संचालिका असलेल्या माँ तुळजा भवानी ट्रेडिंग कार्पोरेशनविरुद्ध फसवणूक व गुन्हेगारी कट रचल्याचा गुन्हा दाखल केला होता. याबाबतचे वृत्त मंगळवारी प्रकाशित होताच समीर व कलेले नागपुरातून कारने जबलपूरकडे रवाना झाले. मध्य प्रदेशातील जबलपूरजवळ कारचा भीषण अपघात झाला. यात दोघे जखमी तर चालकाचा मृत्यू झाला. या घटनेची माहिती घेण्यासाठी गुन्हे शाखा पोलिसांचे पथक जबलपूरला रवाना झाल्याची माहिती आहे. दरम्यान, सिव्हील लाइन्समधील शाखेची तीन कोटी रुपयांनी अधिक फसवणूक केल्याप्रकरणात अटकेतील अशोक शिंदेकर याची दोन दिवस पोलिस कोठडी घेण्यात आली आहे. याप्रकरणात गुन्हा दाखल असलेला प्रॉपर्टी डिलर सतीश वाघ याची प्रकृती खालावल्याने त्याला हॉस्पिटलमध्ये दाखल करण्यात आले. त्यामुळे त्याला अटक होऊ शकली नाही,अशी माहिती पोलिसांनी दिली. या दोन प्रकरणांसह आणखी १७ प्रकरणांचा तपास गुन्हे शाखा पोलिस करीत आहेत. एकूण १९ प्रकरणांमध्ये देना बँकेची सुमारे १०० कोटींनी फसवणूक करण्यात आली. गुन्हे दाखल झाल्याचे कळताच अनेक आरोपी भूमिगत झाल्याचीही चर्चा आहे.