म.टा. वृत्तसेवा, नागपूर
ज्येष्ठ सामाजिक कार्यकर्त्या अॅड. सीमा साखरे यांच्या कन्या अॅड. सुहासिनी त्र्यंबकराव साखरे (वय ४४) यांचे गुरुवारी अपघातात निधन झाले. सावनेर-नागपूर मार्गावरील पिंपळा डाक बंगला येथे उभ्या असलेल्या ट्रकला त्यांच्या नॅनोने (एमएच ३१ डीव्ही ७१८०) धडक दिल्याने हा अपघात झाला. ही घटना गुरुवारी दुपारी अडीच वाजताच्या सुमारास घडली.
सुहासिनी साखरे या सात वर्षांपासून लंडन येथे वास्तव्यास होत्या. दोन वर्षांपूर्वी त्या नागपुरात आल्या होत्या. पुढील महिन्यात त्यांचा कॅलिफोर्निया येथे जाण्याचा मानस होता. त्यासाठीची त्यांची तयारीसुद्धा पूर्ण झाली होती. काही खासगी कामानिमित्ताने आपल्या कारने सावनेर येथे त्या गेल्या होत्या. गुरुवारी सावनेर येथून परतताना दुपारी अडीच वाजताच्या सुमारास पिंपळा डाग बंगलाजवळील पुलावर एक ट्रक नादुरुस्त स्थितीत उभा होता. सुहासिनी यांचा अंदाज चुकल्याने त्यांची कार ट्रकला मागून धडकली. ही धडक इतकी भीषण होती की या धडकेत कारचा पूर्णतः चेंदामेंदा झाला. तर, गंभीर दुखापत झाल्याने सुहासिनी यांचा जागीच मृत्यू झाला.
घटनेची माहिती मिळताच खापरखेडा पोलिसांनी घटनास्थळी धाव घेतली. सुहासिनी यांच्याकडे असलेल्या कागदपत्रांच्या आधारे त्यांची ओळख पटविण्यात आली. यानंतर पोलिसांनी त्यांच्या नातेवाईकांशी संपर्क साधला. यानंतर त्यांचा मृतदेह नागपूर येथील मेयो रुग्णालयात उत्तरीय तपासणीसाठी नेण्यात आला. सायंकाळी उत्तरीय तपासणी झाल्यावर सुहासिनी यांचा मृतदेह नातेवाइकांच्या ताब्यात देण्यात आला. याप्रकरणी खापरखेडा पोलिसांनी ट्रक चालकाविरुद्ध गुन्हा दाखल केला असून पुढील तपास सुरू आहे.