म.टा.विशेष प्रतिनिधी, नागपूर
राष्ट्रसंत तुकडोजी महाराज नागपूर विद्यापीठातील रिक्त असलेल्या कुलसचिव पदाकरिता अखेर जाहिरात काढण्यात आली असून इच्छुक उमेदवारांना २५ मार्चपर्यंत अर्ज दाखल करण्याची सूचना करण्यात आली आहे. दरम्यान, या जाहिरातीत काही वादग्रस्त मुद्यांवर अत्यंत स्पष्टपणे सूचना नोंदवण्यात आल्या आहेत, हे विशेष.
नागपूर विद्यापीठातील कुलसचिव पद भरण्यात येणार असल्याचे कुलगुरू डॉ. सिद्धार्थविनायक काणे यांनी 'मटा'शी बोलताना गेल्या महिन्यात स्पष्ट केले होते. त्यानुसार विद्यापीठाने कुलसचिव पदाकरिता जाहिरात काढली असून त्यामुळे एकाच दगडात अनेक पक्षी मारण्याचा विक्रमही कुलगुरू डॉ. काणे यांनी केला आहे. अनुसूचित जाती आयोगाने उपकुलचिव अनिल हिरेखण यांच्याकडे कुलसचिव पदाचा कार्यभार सोपपावा, असा आदेश नागपूर विद्यापीठाला दिला होता. परंतु, आयोगाचा आदेश हा विद्यापीठावर बंधनकारक नाही. तसेच राज्य सरकारकडूनही स्पष्ट आदेश देण्यात आले नव्हते. त्यामुळे कुलगुरू डॉ. काणे यांनी जाहिरात प्रकाशित करून पूर्णकालीन कुलसचिव नियुक्त होणार असल्याचे संकेत दिलेत. त्यामुळे अनिल हिरेखण यांचा कुलसचिव पदावरील दावा तसाच फेटाळण्यात आला आहे.
दरम्यान, निवृत्ती वयाच्या वादावरून माजी कुलसचिव डॉ. पुरण मेश्राम यांनी मुंबई हायकोर्टाच्या नागपूर खंडपीठासमोर याचिका दाखल केली आहे. मेश्राम यांनी ते शिक्षक प्रवर्गातून असल्याने त्यांचे सेवानिवृत्ती वय ६० वर्ष असल्याचा दावा केला आहे. तर राज्य सरकारने डॉ. मेश्राम यांचा संपूर्ण सेवाकाळ हा शिक्षकेतर प्रवर्गातून असल्याने त्यांचे निवृत्ती वय ५८ वर्ष असल्याचे स्पष्ट करीत त्यांना निवृत्त करण्याचा आदेश विद्यापीठाला दिला होता. त्यामुळे या वादावर हायकोर्टात याचिका प्रलंबित आहे. तर मेश्राम यांनी त्या याचिकेचा निकाल लागेपर्यंत कुलसचिव पद भरण्यास विरोध केला होता. मात्र, त्यांचा विरोध झुगारून कुलगुरू डॉ. काणे यांनी कुलसचिव पदाकरिता जाहिरात देण्याचा निर्णय घेतला. त्यामुळे डॉ. काणे यांनीही मेश्राम समर्थकांना एकप्रकारे संदेशच दिला आहे.
डॉ. मेश्राम यांनी कुलसचिव पदावर असताना प्रोफेसर पदाचा पे ग्रेड मागितला होता. त्यासंदर्भात राज्य सरकारकडून एक आदेशही काढण्यात आला होता. परंतु, सदर आदेश रद्द करण्यात आल्याने आता उच्च शिक्षण संचालकांनी त्यांच्यावर सुमारे २३ लाखाची वसूली देखील काढली आहे. त्या वादाच परिणाम म्हणून कुलसचिव पदाकरिता ८९०० पे ग्रेड राहील असे जाहिरातीत नमूद करण्यात आले आहे. त्याशिवाय केवळ शिक्षक प्रवर्गातून नियुक्त होणाऱ्या उमेदवाराला निवृत्ती वय ६० वर्ष राहील, असा उल्लेखही जाहिरातीत केला आहे.
जाहिरात कुलसचिवांच्या नावाने कशी ?
दरम्यान, ऑगस्ट २०१८ पासून विद्यापीठातील कुलसचिव पद रिक्त आहे. त्या पदाचा अतिरिक्त कार्यभार परीक्षा नियंत्रक डॉ. नीरज खटी यांच्याकडे सोपवण्यात आला आहे. परंतु, विद्यापीठाने कुलसचिवांच्या नावाने जाहिरात प्रकाशित केली आहे. त्यात कुठेही प्रभारी कुलसचिव असा उल्लेख केलेला नाही, हे विशेष.
----------------------