ओला कॅबचालकांची मागणी
म.टा. प्रतिनिधी, नागपूर
ओला कंपनीकडून वाहनचालकांसोबत मनमानी व्यवहार केला जात आहे. वाहनचालकांच्या बाबतीत भेदाभेद केला जात आहे. याविरुद्ध ओला कॅबचालकांनी आवाज उठविला आहे. बोनस देण्यामध्ये होणारा भेदभाव टाळून सहा रुपयांप्रमाणे प्रत्येकाला बोनस मिळायला हवी, अशी मागणी करण्यात आली आहे.
ओला लिजींग ड्रायव्हर्सचे म्हणणे होते की, कंपनी काहींचा बोनस ६ रुपये, काहींचा १० रुपये तर काहींना एक रुपयाही बोनस देत नाही. बोनस ही ड्रायव्हरची खरी कमी आहे. असे असताना कंपनी कधीही बोनस कमी-जास्त करते. एक रुपया मायनस आला तर गाडी बंद केली जाते. अपघात झाल्यानंतर २५०० रुपये ड्रायव्हरकडून वसूल केले जातात. गाडी देताना सहा रुपये बोनस देऊ, असे सांगितले होते. काही दिवसांपासून बोनस बंद केला आहे. कमिशनही २०वरून ३० टक्के झाले आहे. सहा रुपयेप्रमाणे बोनस द्यावा. बोनस नसेल तर ३० टक्के कमिशन घेऊ नये, अशी वाहनचालकांची मागणी आहे. काही दिवसांपूर्वी ओला कॅबचालकांनी यासंदर्भात संपदेखील पुकारला. कस्तूरचंद पार्क येथे एकत्र येत कॅबचालकांनी कंपनीच्या धोरणाचा निषेध नोंदविला होता. मात्र, अद्याप यावर तोडगा निघालेला नाही.
चालकांच्या या आहेत मागण्या...
चालकांचे म्हणणे आहे की, त्यांच्या उत्पन्नात सातत्याने घट होत आहे. युनियनने अनेक मागण्या केल्या आहेत. यामध्ये चालकांना पहिल्यासारखा कमीतकमी १.२५ लाखांचा व्यवसाय मिळावा. कंपनीद्वारे चालवण्यात येणाऱ्या कॅब बंद कराव्यात. ज्या चालकांना प्रवासी ग्राहकांनी कमी रेटिंग दिले आहे, त्यांना परत कामावर घेतले जावे, तसेच गाडीच्या किमतीनुसार भाडे निश्चित करण्यात यावे. मुख्य म्हणजे बोनस हा समान असायला हवा.
अनेकांचे हप्ते थकीत
कॅबचालकांचा व्यवसाय मंदावला आहे. त्याचा परिणाम म्हणून चालकांना कर्ज फेडण्यातील अडचणींसह कमी उत्पन्न आदी अन्य समस्याही जाणवत आहेत. ओला-उबेर या कंपन्यांकडून चालकांची पिळवणूक केली जात असून सुरुवातीच्या कालावधीत केलेले करार पाळले जात नसल्याचाही आरोप केला जात आहे.