म.टा. प्रतिनिधी, नागपूर
विभागीय आयुक्त कार्यालयाचा परिसर…. प्रशासनातील सर्व वरिष्ठ अधिकाऱ्यांचा वावर जिथे असतो ते ठिकाण... प्रशासकीय अधिकाऱ्यांचे बळ असणारा हा परिसर अस्वच्छतेमुळे प्रकाशझोतात आला. त्याहीउपर आता एक कळस झाला आहे. या परिसरात कचऱ्यासोबतच दारूच्या बॉटल्सचा खचही आढळून आल्याने 'या परिसरात चाललंय तरी काय', असा प्रश्न उपस्थित झाला आहे.
पंतप्रधान नरेंद्र मोदी यांनी स्वत: हातात झाडू घेऊन स्वच्छ भारत मोहिमेला सुरुवात केली. स्वच्छतेच्या मोहिमेत सर्वांनीच सहभागी होण्याचे आवाहनही केले. मात्र, विभागीय आयुक्त कार्यालयापर्यंत हा आवाज अद्यापही पोहोचलाच नसल्याचे वास्तव आहे. कालपर्यंत इथे केवळ कचऱ्याचाच ढीग दिसत होता. आता कचऱ्यासोबत दारूच्या बॉटल्सचाही खच आढळून आल्याने एकच खळबळ उडाली आहे. विशेष म्हणजे पोलिस नियंत्रण कक्ष येथून हाकेच्या अंतरावर आहे.
कुठल्याही चांगल्या कार्याची सुरुवात स्वत:पासून करा, असा संदेश दिला जातो. हाच संदेश देण्यासाठी पंतप्रधानांपासून ते अनेक विभागातील वरिष्ठ अधिकारी, सामाजिक कार्यकर्ते, नेते, अभिनेते सर्वांनीच हातात झाडू घेऊन परिसर स्वच्छतेच्या मोहिमेत सहभाग दर्शविला. उपराजधानीचे ठिकाण असलेल्या नागपुरातील विभागीय आयुक्त कार्यालय परिसरातील हे चित्र मात्र याउलट आहे. सिंचन भवनासमोरील कचऱ्याचा ढीग तसाच कायम आहे.