म. टा. विशेष प्रतिनिधी, नागपूर
महापालिकेसंबंधी समस्यांची तक्रार करताना कुठल्या विभागाकडे कोणती तक्रार करायची यामध्ये नागरिकांना मन:स्ताप सहन करावा लागतो. ही समस्या दूर करण्यासाठी मनपातर्फे 'इक्वी-सिटी मोबाइल ॲप' तयार करण्यात आले आहे. या ॲपच्या माध्यमातून एकाच ठिकाणी नोंदविलेली तक्रार संबंधित विभागाकडे जाणार आहे. त्यावर आवश्यक कार्यवाही केली जाणार आहे.
नागपूर महापालिकेमध्ये युरोपीयन युनियनच्या सहकार्याने अखिल भारतीय स्थानिक स्वराज्य संस्थेद्वारे मागील तीन वर्षांपासून 'इक्वी-सिटी' प्रकल्प कार्यान्वित आहे. संपूर्ण शहरात समानतेच्या तत्त्वाने नागरी सुविधा पुरविण्याबाबत प्रकल्पाद्वारे कार्य केले जाते. याच प्रकल्पाच्या माध्यमातून 'इक्वी-सिटी मोबाइल ॲप' तयार करण्यात आले आहे. हे ॲप 'गुगल प्ले स्टोअर'वर नागरिकांना डाउनलोड करण्यासाठी उपलब्ध आहे. 'इक्वी-सिटी मोबाइल ॲप'मध्ये मनपा सेवांबद्दल प्रश्नावली आधारित सर्वेक्षण आहे. या आधारे सेवांबाबत नागरिकांचे समाधान व असामाधान याविषयी विश्लेषण केले जाईल. नागरिकांनी नोंदविलेला हा अभिप्राय सुविधांबाबत कमकुवत असलेल्या प्रभागांमध्ये मनपाने सेवा सुधारण्याच्या दृष्टीने आवश्यक निर्णयासाठी सहाय्यक ठरणार आहे. अचूक वेळेत सर्वेक्षण डेटा प्राप्त करण्याबाबत ॲपमध्ये वेब आधारित बॅकएंड आहे. यामुळे नागरिकांना पुरविण्यात येत असलेल्या सुविधांच्या गुणवत्तेबाबत विश्लेषणासंदर्भात मनपाला योग्य माहिती मिळवून देण्यासाठी मदत होईल.
नागरिकांच्या सुविधांचे योग्य वेळेत निरीक्षण आणि त्याचे मूल्यमापन करून त्याबद्दल योग्य प्रभावी निर्णय घेण्यासाठी प्रोत्साहित करणे हा या ॲपच्या निर्मितीचा हेतू आहे. मनपा सुविधांबद्दल नागरिकांमार्फत प्रशासनाला अभिप्राय किंवा सूचना पोहोचविण्यासाठी हे ॲप एक सेतू म्हणून कार्य करेल. नागपूर महापालिकेचे पारदर्शी प्रशासनिक कार्य विकसित होऊन त्याचा नागरिकांना लाभ व्हावा यासाठी प्रभाग आणि झोनस्तरावर सुविधास्तर देखरेखीसाठी ॲपच्या माध्यमातून केंद्रीकृत डॅशबोर्ड प्रदान केले जाणार आहे.
प्रभागाची सीमा, नगरसेवकांची माहिती ॲपवर
महापालिकेमध्ये प्रभाग पद्धती अस्तित्वात आहे. एका प्रभागामध्ये चार नगरसेवक आहेत. त्यामुळे आपल्या प्रभागाची सीमा, नगरसेवक याबाबतही नागरिकांमध्ये संभ्रम असतो. ॲपद्वारे झोन, प्रभाग याबाबद्दल इत्यंभूत माहिती मिळणार आहे. प्रभागाची सीमा तसेच प्रभागातील 'अ','ब','क','ड' निहाय नगरसेवकांचे नाव, त्यांचे संपर्क क्रमाक तसेच इतर माहिती ॲपद्वारे मिळणार आहे. त्यामुळे नागरिकांच्या सुविधेच्यादृष्टीने ॲप अत्यंत उपयुक्त ठरेल.
'अॅप'बद्दल थोडेसे
-ॲपमध्ये आपले नाव, झोन आणि प्रभाग नोंदवा
- झोन किंवा प्रभागातील सुविधांबाबत रेटींग द्या
- अभिप्राय आणि सूचना नोंदवून आपल्या भागातील सेवा सुधारित करा
-आपल्या ॲपवर सेवा आणि कार्याचे केव्हाही परीक्षण करा
-आपले झोन शहरातील सर्वोत्तम पाच झोनमध्ये घेऊन या
-कचरा, मृत जनावरे, प्रसाधनगृहांची अस्वच्छता आपल्या परिसरातील अशा समस्या नोंदवा
-संबंधित प्रशासनामार्फत आपल्या समस्या सोडविल्या जातील