म. टा. विशेष प्रतिनिधी, नागपूर
राष्ट्रीय विधी सेवा प्राधिकरण, महाराष्ट्र राज्य विधी सेवा प्राधिकरण, भगवान महावीर विकलांग सहायता समिती आणि महावीर इंटरनॅशनल नागपूर यांच्या संयुक्त विद्यमाने १ ते ५ मार्च या कालावधीत दिव्यांगांना कृत्रिम अवयव व उपकरणे वाटपाच्या शिबिराचे आयोजन करण्यात आले आहे. या शिबिराचे उद्घाटन देशाचे सरन्यायाधीश न्यायमूर्ती शरद बोबडे यांच्या हस्ते होणार आहे.
शहरातील आमदार निवास परिसरात आयोजित करण्यात आलेल्या या शिबिराचे उद्घाटन सकाळी ११.३० वाजता होणार आहे. या कार्यक्रमाला सरन्यायाधीश शरद बोबडे यांच्यासोबत सुप्रीम कोर्टातील न्यायमूर्ती भूषण धर्माधिकारी, न्यायमूर्ती सूर्य कांत, न्या. रवींद्र भट, नागपूर हायकोर्टातील प्रशासकीय न्यायमूर्ती रवी देशपांडे आाणि भगवान महावीर विकलांग सहायता समितीचे प्रमुख व संस्थापक डी. आर. मेहता प्रामुख्याने उपस्थित राहणार आहेत.
या शिबिरात दिव्यांग व गरजूंना तीन चाकी सायकल, व्हीलचेअर, कॅलिपर्स, कृत्रिम पाय, कृत्रिम हात इत्यादींचे वाटप होणार आहे. शिबिरात राज्यभरातून सुमारे १७०० लाभार्थी येणार आहेत. तर सर न्यायाधीश शरद बोबडे यांच्या हस्ते १८ दिव्यांगांना वस्तू व उपकरणांचे वाटप होणार आहे, अशी माहिती हायकोर्टातील निबंधक अंजू शेंडे यांनी दिली.
शिबिराबाबत माहिती देताना अंजू शेंडे म्हणाल्या, या शिबिराचा उद्देश दिव्यांग व पात्र व्यक्तींना उपकरणे प्रदान करण्यासाठी आयोजित केला आहे तसेच या शिबिरातून लाभ घेतल्याशिवाय कोणताही लाभार्थी परत जाणार नाही, याची हमी घेण्यात आली आहे. एक ते सात मार्च या कालावधीत शिबिर होत असून, तिथेच शिबिराच्या तीन ते चार दिवस आधी कृत्रिम पाय व हात यांच्या निर्मितीची कार्यशाळादेखील होणार आहे. शिबिराकरिता येणाऱ्या दिव्यांगांना आवश्यक कृत्रिम अवयवांचे माप घेऊन ते तेथेच निर्मित केले जाणार आहे. लाभार्थींच्या राहण्याची व्यवस्था आयोजकांतर्फे आमदार निवासात करण्यात आली आहे. या शिबिराकरिता १७०० जणांची निवड केली असली तरीही राज्यातील इतरही गरजूंना २५ फेब्रुवारीपर्यंत नोंदणी करता येणार आहे. त्यासाठी त्यांनी राज्यातील विविध जिल्हा न्यायालयात असणाऱ्या जिल्हा विधी सेवा समितीकडे नावे नोंदवावी तसेच ७५८८५१३५४५ या क्रमांकावरदेखील माहिती पाठवून नोंदणी करावी, असे आवाहन हायकोर्टाच्या निबंधक अंजू शेंडे यांनी केले आहे.
.......