म. टा. विशेष प्रतिनिधी, नागपूर
करोनाचा प्रादुर्भाव रोखण्यासाठी सुरू असलेल्या लॉकडाउनमुळे हातावर पोट भरणाऱ्या विविध घटकांचे मोठ्या प्रमाणात नुकसान झाले आहे. नाभिक समाजालाही मोठा फटका बसला असल्याने शहरातील सलून तत्काळ सुरू करण्यास परवानगी द्यावी, अशी मागणी महाराष्ट्र नवनिर्माण सेनेचे प्रदेश सरचिटणीस हेमंत गडकरी यांनी पालकमंत्री नितीन राऊत यांच्याकडे केली आहे. जिल्हाधिकारी रवींद्र ठाकरे व महापालिका आयुक्त तुकाराम मुंढे यांनाही निवेदन दिले.
करोनाचे संकट आणखी किती महिने चालेल, हे सांगता येत नाही. सर्वांनी लॉकडाउनसह इतर नियमांचे पालन केले. ३ व ८ जून रोजी जारी केलेल्या आदेशात बहुतांश व्यवसाय सुरू करण्यात आले. यात सलूनचा मात्र समावेश नाही. ३ महिन्यांपासून नाभिक समाजावर मोठे संकट आले आहे. परिस्थिती कठीण होत आहे. त्यांच्याकडे उत्पन्नाचे अन्य साधन नाही. 'नाभिक एकता मंच'चे जयंत तळखंडे यांनी समाजासमोर असलेली भीषण स्थिती मांडली आहे. इतर व्यवसायाप्रमाणे आवश्यक खबरदारी घेण्यासह निर्बंध लावून सलून सुरू करण्यास परवानगी दिल्यास समाजाला मोठा दिलासा मिळेल. याबाबत तातडीने निर्णय घेऊन आदेश जारी करावा, असेही हेमंत गडकरी यांनी म्हटले आहे.
.............