म.टा. प्रतिनिधी, नागपूर
सामाजिक क्षेत्रात उल्लेखनीय कार्याबद्दल डॉ. प्रकाश बाबा आमटे यांना जीवनगौरव पुरस्काराने सन्मानित केले जाणार आहे. बिल अॅण्ड मेलिंडा गेट्स फाउंडेशनचे उपाध्यक्ष बिल गेट्स यांच्या हस्ते डॉ. आमटे यांचा गौरव केला जाणार आहे. रविवार, १७ नोव्हेंबर रोजी नवी दिल्लीत हा कार्यक्रम होणार आहे.
आरोग्य आणि कुटुंब कल्याण मंत्रालय आणि इंडियन कौन्सिल ऑफ मेडिकल रिसर्च यांच्या संयुक्त विद्यमाने आरोग्य सेवेमध्ये उल्लेखनीय योगदान देणाऱ्यांना गौरवण्यात येणार आहे. त्यात डॉ. प्रकाश आमटे, डॉ. सायरस पूनावाला, डॉ. किरण मझूमदार-शॉ यांचा गेट्स यांच्या हस्ते सत्कार करण्यात येणार आहे. रविवारी सायंकाळी नवी दिल्लीतील आयसीएमआर हॉल येथे हा सोहळा होईल. डॉ. आमटे यांना आतापर्यंत मॅगेसेसे पुरस्कारानेही सन्मानित करण्यात आले. लोकबिरादरी प्रकल्पाच्या माध्यमातून ते गडचिरोलीतील नागरिकांना आरोग्य सेवा प्रदान करीत आहेत. या कार्यासाठी त्यांचा महाराष्ट्र आरोग्य विद्यापीठाने 'डॉक्टर ऑफ लिटरेचर' या पदवीने गौरव केला होता. लोकबिरादरी प्रकल्पाच्या माध्यमातून डॉ. आमटे हे हेमलकसा या दुर्गम भागात आरोग्य सेवा प्रदान करीत आहेत. यासाठी विविध संस्थांच्यावतीने त्यांना आतापर्यंत अनेक पुरस्कारांनी सन्मानित करण्यात आले आहे.