नागपूरच्या डॉक्टरचा अपघाती मृत्यू

नागपूर : उमरेड-नागपूर महामार्गावरील चक्रीघाट शिवारात कार उलटल्याने डॉक्टरचा मृत्यू झाल्याची घटना रविवारी पहाटेच्या सुमारास घडली. डॉ. दुर्गेश विष्णू पडोळे (३५) रा. लकडगंज, नागपूर असे त्यांचे नाव आहे. एमएच ३१-डीव्ही ६८१८ या क्रमांकाच्या कारने नागपूरवरून उमरेड-कऱ्हांडला येथे जात होते. अचानक गाडीवरील नियंत्रण सुटल्याने कार उलटली. यातच पडोळे यांच्या डोक्याला जबर मार लागल्याने त्यांचा जागीच मृत्यू झाला. उमरेड पोलिसांना माहिती मिळताच सहाय्यक पोलिस निरीक्षक गुलाब धुर्वे यांनी घटनास्थळी धाव घेतली. कार पूर्णत: चक्काचूर झाली होती. या प्रकरणी उमरेड पोलिसांनी गुन्हा दाखल केला असून अधिक तपास सुरू आहे.