म. टा. प्रतिनिधी, नागपूर
गुन्हेशाखा पोलिसांनी कार चोरी करणाऱ्या आंतरराज्यीय टोळीचा पर्दाफाश करून कार चोरट्यांना अटक केली. एम. मनीषकुमार एन. महेश्वरराव (वय २४) आणि मोहम्मद युसूफ मोहम्मद इकबाल (वय २४, दोन्ही रा. बिलासपूर, छत्तीसगड),अशी अटकेतील कार चोरांची नावे आहेत.
पोलिसांनी दिलेल्या माहितीनुसार, अनिल सदाशिव महदुरे रा. सूरजनगर, हिंगणा यांची २६ ऑगस्टला एमएच -४०- बीई-१०७९ या क्रमांकाची कार चोरी गेली. याप्रकरणी हिंगणा पोलिसांनी चोरीचा गुन्हा दाखल केला. गुन्हेशाखेचे अतिरिक्त पोलिस आयुक्त नीलेश भरणे, गुन्हेशाखेचे उपायुक्त गजानन राजमाने,साहाय्यक पोलिस आयुक्त सुधीर नंदनवार यांनी या चोरीचा छडा लावून चोरट्यांना अटक करण्याचे निर्देश गुन्हेशाखेचे वरिष्ठ पोलिस निरीक्षक भीमराव खणदाळे यांना दिले. खणदाळे यांच्या नेतृत्वात पोलिस उपनिरीक्षक मयूर चौरसिया, हेडकॉन्स्टेबल रवींद्र गावंडे, नरेंद्र ठाकूर, प्रवीण रोडे, सागर ठाकरे, कुणाल मसराम, सुहास शिंगणे, सूरज भोंगाळे, आशिष पाटील यांनी कार चोरांचा शोध सुरू केला. महदुरे यांनी २५ ऑगस्टला वाडीतील हुंडाई शोरूममध्ये कार सर्व्हिसिंगला दिली होती. यावेळी येथील कर्मचाऱ्याने कारची अन्य एक चावी महादुरे यांना मागितल्याचे तपासादरम्यान समोर आले. गुन्हेशाखा पोलिसांनी शोरुममधील सीसीटीव्ही फूटेजची पाहणी केली. एक युवक संशयास्पद स्थितीत कारजवळ उभा असल्याचे आढळले. त्यानंतर पोलिसांनी शहरातील सीसीटीव्ही फूटेजही पाहणी केली. चोरटे कार घेऊन छत्तीसगडमधील बिलासपूरकडे गेल्याचे स्पष्ट झाले. पोलिसांचे पथक बिलासपूर येथे गेले. दोघांना अटक करून कार जप्त केली. युसूफ याच्याविरुद्ध बिलासपूर येथे मारहाणीचे १४ गुन्हे दाखल आहेत.
......