कुख्यात सुमित ठाकूरविरुद्ध आणखी एक मोक्का

म.टा. प्रतिनिधी, नागपूर

गुन्हेगार पिन्नू ऊर्फ कुलदीप पांडे याच्यावर बेछूट गोळीबार करून त्याची हत्या करण्याचा प्रयत्न केल्याप्रकरणात अटकेतील कुख्यात गुन्हेगार सुमित राजकुमार ठाकूर (वय ३०) व त्याच्या साथीदारांविरुद्ध पोलिसांनी महाराष्ट्र संघटित गुन्हेगारी नियंत्रण कायद्यानुसार (मोक्का) कारवाई केली. मोक्काअंतर्गत कारवाई करण्यात आलेल्यांमध्ये कुख्यात नौशाद पीर मोहम्मद खान व इरफान बंदुकियाचाही समावेश आहे. नौशाद याच्याविरुद्ध यापूर्वीही मोक्कांतर्गत कारवाई करण्यात आली आहे. मोहम्मद इरफान ऊर्फ बंदुकिया सामी सिद्दिकी (वय ३७), सूर्यप्रकाश ऊर्फ पिंकू हरिप्रसाद तिवारी (वय ३०), मनोज ऊर्फ मोन्या प्रकाश शिंदे (वय ३२), विनय ऊर्फ लाला राजेंद्रप्रसाद पांडे (वय ३०), उज्जी ऊर्फ उजैर परवेज अब्दुल खालिद (वय ३०), पीयूष गजानन वानखेडे (वय २२), जुनैद ऊर्फ जिशान गुलशेर खान (वय २६), अमित ऊर्फ अण्णा नरेंद्रकुमार स्वामी (वय २५), सय्यद शाहनवाज अली सैय्यद जाकीर अली (वय २२), वजुल ऊर्फ सैम बिष्ट (वय ४०) व नीलेश अशोक उके (वय २७) ,अशी अन्य आरोपींची नावे आहेत.

फरार असताना नौशाद याने सुमित याच्या मदतीने पिन्नू याला ठार मारण्याचा कट आखला. या कटात त्यांनी अन्य सहकाऱ्यांना सामिल केले. या टोळीने पिन्नू याच्यावर गोळीबार केला होता. यात तो थोडक्यात बचावला. याप्रकरणात पोलिसांनी उज्जी व पीयूष याला अटक केली होती. पोलिस आयुक्त डॉ. भूषणकुमार उपाध्याय यांनी सुमित याला अटक करण्याचे आदेश दिले. गुन्हे शाखा पोलिसांनी त्याला अटक केली. गिट्टीखदान पोलिस स्टेशनचे पोलिस निरीक्षक विनोद चौधरी यांनी सुमित व त्याच्या साथीदाराविरुद्ध गुन्हे अभिलेखाची पडताळणी केली. या टोळीविरुद्ध हत्या, हत्येचा प्रयत्न, मारहाण, वर्चस्वासाठी दंगल करणे आदींसह गंभीर गुन्हे दाखल असल्याचे समोर आले. त्यानंतर पोलिस उपायुक्त चिन्मय पंडित व गुन्हे शाखेचे उपायुक्त संभाजी कदम यांनी सुमित व त्याच्या साथीदारांविरुद्ध मोक्काचा प्रस्ताव तयार केला. तो अतिरिक्त पोलिस आयुक्त श्यामराव दिघावकर यांच्याकडे पाठविला. दिघावकर यांनी या प्रस्तावाला मंजुरी दिली.