फोटो आहे
अंशुमन रथ करणार
विदर्भ संघाचे प्रतिनिधीत्व?
-हाँगकाँग क्रिकेट संघाचा माजी कर्णधार खेळणार नागपुरात क्लब क्रिकेट
म.टा. क्रीडा प्रतिनिधी, नागपूर
विदर्भ रणजी क्रिकेट संघाकडून पुढील वर्षी हाँगकाँग संघाचा माजी कर्णधार अंशुमन रथ खेळताना दिसल्यास आश्चर्य वाटायला नको. गेल्या वर्षी झालेल्या आशिया कप क्रिकेट स्पर्धेत हाँगकाँग संघाची धुरा सांभाळणाऱ्या अंशुमनने भारतीय क्रिकेट संघाविरुद्ध ७३ धावांची खेळी केली होती. मूळ भारतीय असलेल्या रथने विश्वचषक ट्वेंटी-२० क्रिकेट स्पर्धेच्या पात्रता फेरीसाठी हाँगकाँग संघाकडून खेळण्यास असमर्थतता दर्शविली असून सध्या विदर्भ क्रिकेट संघटनेसोबत बोलणी सुरू केली आहे.
मूळ ओडिशाचा असलेल्या रथने विदर्भ क्रिकेट संघटनेचे उपाध्यक्ष प्रशांत वैद्य यांच्याशी चर्चा केली असल्याची माहिती आहे. मात्र, थेट संघातील प्रवेशाबाबत कोणतीही हमी देण्यात आलेली नाही. त्यामुळे सूत्रांच्या मते अंशुमन रथला व्हीसीच्या स्थानिक स्पर्धांमध्ये क्लब क्रिकेट खेळावे लागणार आहे. विशेष म्हणजे रथच्या समावेशाबद्दल व्हीसीएने भारतीय क्रिकेट नियामक मंडळाचे महाव्यवस्थापक साबा करीम यांच्याशी चर्चा केली आहे. 'बीसीसीआयनेही याबद्दल सकारात्मकता दर्शविली असून मला स्वत:ला आधी क्लब क्रिकेट खेळावे लागेल व त्यात चांगली कामगिरी केल्यानंतरच पुढील मार्ग खुला होऊ शकेल,' अशी माहिती २२ वर्षीय अंशुमनने 'महाराष्ट्र टाइम्स'शी बोलताना दिली.
'विदर्भ संघ गेल्या दोन वेळचा रणजी करंडकाचा विजेता आहे. त्यामुळे थेट विदर्भ संघात स्थान मिळवणे शक्य नाही. मात्र, असे असले तरी विदर्भ संघ व्यवस्थापन अत्यंत प्रोफेशनल आहे. संघानेही अलीकडच्या काळात स्वत:चा एक वेगळा दबदबा निर्माण केला आहे. इतकेच नव्हे भारतात क्रिकेट या खेळामध्ये प्रतिभावान खेळांडूची मोठी संख्या आहे. त्यामुळे नक्कीच इतर मोठ्या राज्यांच्या संघाने माझा फारसा विचार न करणे स्वाभाविक आहे. पण, व्हीसीएसोबतची प्रक्रिया अंत्यत पारदर्शक राहिली आहे. त्यामुळे या संघासोबत पुढील वाटचालीच्या दृष्टीने ही अत्यंत चांगली बाब आहे,' असेही अंशुमनने स्पष्ट केले.
यासंदर्भातील घडामोडीला व्हीसीएच्या सूत्रांनीही दुजोरा दिला आहे. व्हीसीएकडून स्थानिक क्रिकेट कोणीही खेळू शकतो. मात्र, संघात येण्यासाठी खेळाडूला चांगली कामगिरी करावी लागेल. अलीकडच्या काळात आमच्या संघात अनेक चांगले खेळाडू आहे, तर राखीव खेळाडूंची संख्याही मोठी आहे. २३ व १९ वर्षांखालील अनेक खेळाडू चांगली कामगिरी करून संघाचा दरवाजा ठोठावत आहेत. त्यामुळे रथला अत्यंत चांगली कामगिरी करून स्वत:चा ठसा उमटावा लागणार आहे. त्यामुळे विदर्भ संघात तो खेळेलेच याची कुठलीही हमी आताच देता येणार नाही, असेही व्हीसीएच्या सूत्रांनी स्पष्ट केले.