आशा भोसले यांना ५३ हजाराचे वीज बिल; चौकशी होणार

मटा ऑनलाइन वृत्त । नागपूर

महावितरणच्या अंदाधूंदी कारभाराचा प्रसिद्ध पार्श्वगायिका आशा भोसले यांना फटका बसला आहे. बंगल्यात विजेचा वापर होत नसतानाही महावितरणने त्यांना ५३ हजार ८२२ रुपयाचे अवाढव्य बिल पाठवले आहे. ऊर्जा मंत्री चंद्रशेखर बावनकुळे यांनी महावितरणच्या या गलथान कारभाराची दखल घेत या प्रकरणाची चौकशी करण्याचे आदेश दिले आहेत.

लोनावळ्यातील तुंगार्ली गावात आशा भोसले यांचा बंगला आहे. या बंगल्यात त्या फारशा राहत नाहीत. त्यामुळे जवळ जवळ विजेचा वापर होत नाही. असे असतानाही महावितरणने त्यांना १८ ऑक्टोबर रोजी दोन-चार हजाराचे नव्हे तर ५३ हजार ८२२ रुपये वीज बिल पाठवले आहे. या पुर्वी सुद्धा महावितरणने त्यांना ६५ हजार ते ८५ हजाराचे बिल पाठविल्याने याप्रकाराची चौकशी करण्याची मागणी आशा भोसले यांनी भाजपाचे मुंबई अध्यक्ष आशिष शेलार यांच्याकडे केली होती.



शेलार यांनी आज ऊर्जा मंत्री चंद्रशेखर बावनकुळे यांची भेट घेऊन महावितरणच्या गलथान कारभाराकडे त्यांचे लक्ष वेधत या प्रकराची चौकशी करण्याची मागणी केली. तसेच दोषी अधिकाऱ्यांवर कारवाई करण्याची मागणीही त्यांनी केली. त्यावर बावनकुळे यांनी महावितरणचे पु्णे येथील मुख्य अभियंते मुंडे यांना या प्रकरणाची तात्काळ चौकशी करण्याचे आदेश दिले.