म. टा. वृत्तसेवा, यवतमाळ
इराणहून परलेले नागपूरचे दाम्पत्य माहूरच्या उर्समध्ये सहभागी होण्यासाठी आले होते. त्यांच्यात 'करोना'चे विषाणू असल्याचा संशय जिल्हा आरोग्य प्रशासनाने व्यक्त केल्याने माहुरच्या ग्रामीण रुग्णालयात दाखल करण्यात आले. प्राथमिक तपासणीत त्यांच्या 'करोना'ची कुठलीही लक्षणे दिसून आली नाही. तरीही खबरदारीचा उपाय म्हणून त्यांना स्वतंत्र कक्षात ठेवण्यात आले आहे.
नागपूरच्या बडा ताजबाग भागातील अशफाक अहमद सौदागर (५०) व त्यांची पत्नी सुलताना बेगम अशफाक सौदागर (४५) हे इतर १४ जणांसह ५ फेब्रुवारीला इराणला गेले होते. २५ फेब्रुवारीला हे सर्व मुंबई विमानतळावर उतरले. नंतर दुरांतो एक्स्प्रेसने नागपूरला आले. काही दिवस नागपुरात राहिल्यानंतर ५ मार्च रोजी माहूर येथील सोनापीर बाबा दर्गाहच्या उर्समध्ये सहभागी होण्यासाठी आले. हे दाम्पत्य इराणहून आलेले असल्याने त्यांची आरोग्य तपासणी करणे आवश्यक आहे. त्यांना माहूरवरून नागपूरला परत पाठवावे, असा निरोप नागपूरचे जिल्हा शल्यचिकित्सक संजय जयस्वाल यांनी यवतमाळच्या जिल्हा शल्यचिकित्सकांना ई-मेलद्वारे दिला. त्यामुळे शनिवारी दुपारी ३ वाजताच्या सुमारास या दाम्पत्याला शोधून माहूरच्या ग्रामीण रुग्णालयात दाखल करण्यात आले. त्यांना स्वतंत्र कक्षात ठेवण्यात आले आहे. पण, त्यांच्यात 'करोना'ची कुठलीही लक्षणे दिसून आले नाही. तरीही खबरदारीचा उपाय म्हणून इतर कुणााल त्यांना भेटण्यास मनाई करण्यात आल्याचे वैद्यकीय अधीक्षक डॉ. व्यंकटेश भोसले यांनी सांगितले.