म.टा.विशेष प्रतिनिधी, नागपूर
आयुर्वेद पदवीच्या प्रवेशपरीक्षेत झालेल्या गैरप्रकाराची दखल घेत या कोर्सची फेरपरीक्षा घेणार काय, असा सवाल मुंबई हायकोर्टाच्या नागपूर खंडपीठाने भारतीय आयुर्वेद संस्थेला केला असून, त्यावर आज, सोमवारी निर्णय होण्याची शक्यता आहे.
नागपुरातील नेक्सटेक टेक्नॉलॉजी कंपनीच्या परीक्षा केंद्रात सामूहिक कॉपी झाल्याचा आरोप करणाऱ्या याचिका विद्यार्थ्यांनी हायकोर्टात दाखल केल्या आहेत. तेव्हा हायकोर्टाने नेक्सटेक टेक्नॉलॉजी कम्प्युटर लॅबमध्ये झालेल्या आयुर्वेद पदव्युत्तर परीक्षेतील सीसीटीव्ही फुटेज दाखल करण्याचा आदेश दिला होता. हे फुटेज बघितल्यानंतर विद्यार्थ्यांनी केलेल्या आरोपांवर उत्तर सादर करण्याचा आदेश न्यायालयाने दिला होता. तेव्हा आयुर्वेद संस्था आणि परीक्षा केंद्राने विद्यार्थ्यांनी केलेले आरोप फेटाळून लावले होते.
दरम्यान, खंडपीठाने फुटेज तपासले तेव्हा त्यात केवळ दोनच कॅमेऱ्यांनी केलेले रेकॉर्डिंग आढळून आले. त्यात संपूर्ण परीक्षा हॉल चित्रीत झालेला नाही. त्यामुळे विद्यार्थ्यांनी व्यक्त केलेला संशय योग्य मानून फेरपरीक्षा घेण्यात यावी काय, असा सवाल खंडपीठाने केंद्र सरकारला केला आहे. त्यावर सोमवारपर्यंत उत्तर सादर करण्याचा आदेश देण्यात आला आहे.
आयुर्वेदसह इतर तीन अभ्यासक्रमांच्या प्रवेशासाठी २४ जून २०१८ रोजी प्रवेश परीक्षा घेण्यात आली होती. कामठी रोडवरील नेक्सटेक टेक्नॉलॉजी कंपनीच्या कम्प्युटर लॅबमध्ये या परीक्षेचे केंद्र देण्यात आले होते. तिथे सामूहिक कॉपी झाल्याचा दावा करणारी याचिका किशोर सोनवणे व इतर १८ विद्यार्थ्यांनी केला. सदर याचिकेतील विद्यार्थी हे केवळ आयुर्वेद अभ्यासक्रमाशी निगडित आहेत. त्यामुळे त्यांचा वाद हा केवळ आयुर्वेदच्या प्रवेशापुरता मर्यादित आहे. त्यास्थितीत युनानी, सिद्धा व होमिओपॅथी या तीन कोर्सेसचे प्रवेश करण्याची परवानगी देण्यात आली. याचिकाकर्त्यांच्यावतीने अॅड. अनुप ढोरे यांनी बाजू मांडली.