म.टा. प्रतिनिधी, नागपूर
रुग्णांवर उपचार करणे हे डॉक्टरांचे कर्तव्यच आहे. डॉक्टर्स ते बजावतातही. मात्र, अनेकदा त्यांची योग्य पद्धतीने वैद्यकीय नोंद (मेडिकल रेकॉर्ड) ठेवले जात नाही. याशिवाय अनेकदा रुग्णांच्या आजाराविषयी नातेवाईकांना विश्वासातही घेतले जात नाही. परिणामी काही अघटीत घडले, तर उपचार करूनही डॉक्टर कायद्याच्या कचाट्यात सापडतात. कायद्यासमक्ष शेवटी पुरावे बोलत असतात. ही वेळच येऊ नये, असे वाटत असेल तर डॉक्टरांनी वैद्यकीय नोंदी स्पष्ट ठेवाव्या आणि त्या बाबत पारदर्शकताही बाळगावी, असा उपदेशाचा डोस नॅशनल कंज्युमर डिस्प्युट रिड्रेसल कमिशनचे सदस्य डॉ. एस. एम. कांतिकर यांनी शुक्रवारी डॉक्टरांना दिला.
इंडियन मेडिकल असोसिएशन आणि विदर्भ हॉस्पिटल्स असोसिएशनच्यावतीने 'वैद्यकीय निष्काळजीपणा' हा विषय केंद्रस्थानी ठेवून हे व्याख्यान आयोजित करण्यात आले होते. आयएमएचे अध्यक्ष डॉ. कुश झुनझुनवाला, व्हीएचएचे अध्यक्ष डॉ. अशोक अरबट, सचिव डॉ. आलोक उमरे, ऑरेंज सिटी हॉस्पिटलचे संचालक डॉ. अनुप मरार, वरिष्ठ अधिवक्ता तुषार मंडलेकर, नॅशनल कंज्यूमर डिस्प्युट रिड्रेसल कमिशनचे डेप्युटी रजिस्ट्रार इकबाल अहमद उपस्थित होते.
डॉक्टरांनी जे करू नये ते केल्याने आणि जे केले पाहिजे ते न केल्याने; कायद्याच्या कचाट्यात सापडावे लागते, असे नमूद करीत डॉ. कांतीकर म्हणाले, वैद्यकीय व कायद्याच्या दृष्टीने काय केले पाहिजे हा स्वतंत्र विषय डॉक्टरांनी अभ्यासला पाहिजे. क्लिनिकल प्रॅक्टिसचे काम आटोपल्यार दिवसभरात रुग्णांवर काय उपचार केले आणि यादरम्यान काही चुकले का यावर चिंतन करावे. यातून डॉक्टरांना स्वत:च्याच चुका सुधारण्याची संधी मिळते. मित्राला वा अन्य कुणाला केवळ विश्वासाच्या आधारावर वैद्यकीय प्रमाणपत्र देऊ नये. त्यामुळे देखील कायद्याच्या कचाट्यात सापडण्याची शक्यता नाकारता येत नाही. रुग्ण आणि त्यांच्या नातेवाईकांना आजार, उपचार आणि त्या पुढच्या जोखीमांची पारदर्शकपणे माहिती दिली तर पुढील संघर्ष टाळता येतो. अभ्यास किंवा कौशल्य नसेल तर डॉक्टरांनी सगळे समजते, हा भ्रम बाजूला ठेवून मोह टाळावा. इंजेक्शन देण्यापूर्वी औषधाचे लेबल व नाव तपासावे. उपचारादरम्यान रुग्णाचा मृत्यू झाला तर जवळच्या पोलिसांना, प्रशासनाला कळविण्याची काळजी घ्या. डॉ. झुनझुनवाला यांनी प्रास्ताविक केले. डॉ. मरार यांनी उपक्रमाची माहिती दिली. डॉ. उमरे यांनी सूत्रसंचालन करून आभार मानले.