म. टा. प्रतिनिधी, नागपूर
भोपाळ वायुगळती प्रकरणात फरार असलेल्या आरोपीला सीबीआयने नागपुरात अटक केली. शकील अहमद कुरेशी (वय ८०), असे अटकेतील आरोपीचे नाव आहे. २ डिसेंबर १९८४ ला मध्य प्रदेशातील भोपाळ येथील 'युनियन कार्बाइड'मधून विषारी गॅसगळती झाली. यात हजारो नागरिकांचा जीव गेला, तर हजारोंना अपंगत्व आले होते. शकील कुरेशी हा कंपनीत ऑपरेटर होता. त्यालाही या प्रकरणात आरोपी केले आले. सीबीआयने त्याला अटक केली होती. जामिनावर तो कारागृहातून बाहेर आला. या प्रकरणाच्या खटल्यादरम्यान २०१६पर्यंत तो न्यायालयात हजर झाला. त्यानंतर तो सुनावणीसाठी न्यायालयात हजर झाला नाही. त्यामुळे न्यायालयाने कुरेशीविरुद्ध अटक वॉरंट जारी केला. सीबीआयच्या पथकाने त्याचा शोध सुरू केला. कुरेशी हा नागपुरातील जाफरनगर भागात नातेवाइकाकडे राहात असल्याची माहिती सीबीआयच्या पथकाला मिळाली. मंगळवारी सीबीआयचे पथक नागपुरात आले. पथकाने त्याला अटक केली. त्याला नागपुरातील प्रथम श्रेणी न्यायदंडाधिकाऱ्यांच्या न्यायालयात हजर केले. सीबीआयने न्यायालयाकडून त्याचा ट्रान्झिट वॉरंट मिळवला व त्याला घेऊन भोपाळकडे रवाना झाले. सीबीआय पथकाने कुरेशीला बुधवारी न्यायाधीशांसमोर हजर केले. कुरेशी हा मूळचा इंदूरमधील रहिवासी आहे.