३० फुटांवर लटकला होता कर्मचारी; मेट्रोच्या मॉकड्रीलने रोखला श्वास
म.टा. प्रतिनिधी, नागपूर
मेट्रो रेल्वेचे काम सुरू असताना एक कर्मचारी ३० फुटांवर लटकला…. महामेट्रोच्या सुरक्षा यंत्रणेला त्वरित सूचना देण्यात आली. सुरक्षा चमूने सक्रिय होत या कर्मचाऱ्याला अवघ्या ११ मिनिटांत खाली उतरविले. या कर्मचाऱ्याला वाचविल्यानंतर त्याची वैद्यकीय तपासणी करण्यात आली…. खरी वाटेल अशी सुरक्षा मॉकड्रील महामेट्रोकडून रविवारी करण्यात आली.
आपातकालीन परिस्थितीत सुरक्षेसाठी कोणत्या उपाययोजना करायला हव्यात, याचे प्रशिक्षण मॉकड्रीलच्या माध्यमातून मेट्रोच्या ४ हजार कर्मचाऱ्यांना देण्यात आले. आंतरराष्ट्रीय मानकानुसार उंचावर काम करताना जखमी झालेल्या कर्मचाऱ्यांना वाचवण्यासाठी साधारणत: ३० मिनिटांचा कालावधी लागतो. मात्र, महा मेट्रोने मॉकड्रीलच्या माध्यमाने केवळ ११ मिनिटांत कशाप्रकारे या कर्मचाऱ्यांना वाचवता येऊ शकते, याचे प्रात्यक्षिक सादर केले. एका मॉकड्रीलमध्ये किमान २० कर्मचाऱ्यांना प्रशिक्षण देण्यात येते. आतापर्यंत १८०पेक्षा जास्त मॉकड्रीलचे आयोजन महामेट्रोतर्फे करण्यात आले असून, सुमारे ४ हजार कर्मचाऱ्यांनी याचा लाभ घेतला आहे.
दुर्घटना व्हायला नको...
मॉकड्रील होत असताना नागपूर वाहतूक पोलिस विभागांचे अधिकारी उपस्थित होते. वाहतूक अधिकाऱ्यांनीदेखील यावेळी काही आवश्यक व महत्त्वाच्या घटकांची जाणीव उपस्थितांना करून दिली. महामेट्रो नागपूर प्रकल्पात कार्य करणाऱ्या अधिकारी आणि कर्मचाऱ्यांसाठी महामेट्रोतर्फे वर्धा मार्गावरील उज्ज्वलनगर मेट्रो स्टेशनजवळ सेफ्टी मॉकड्रीलचे आयोजन करण्यात आले होते. आणीबाणीची परिस्थिती उद्भवली तर त्यात अडकलेल्या व्यक्तींच्या बचावाकरिता केल्या जाणाऱ्या उपाययोजनांची माहिती देण्यात आली. बचाव प्रक्रियेमध्ये बचाव यंत्राचा व यंत्रणांचा कसा वापर करावा, अचानक घडलेल्या घटनेला कारणीभूत बाबींचे निरीक्षण करून आवश्यक नोंदी करणे का आवश्यक आहे, याचे महत्त्व पटवून देत कार्यस्थळी उद्भवणाऱ्या धोक्यासंबंधी सविस्तर माहिती अधिकारी आणि कर्मचाऱ्यांना देण्यात आली. दुर्घटना व्हायला नको, यासाठी ही खबरदारी घेण्यात येत असल्याचे महामेट्रोकडून सांगण्यात आले.