भाजप आमदाराच्या अंगरक्षकाची आत्महत्या

मटा ऑनलाइन वृत्त । गडचिरोली

आरमोरी विधानसभा क्षेत्राचे भाजप आमदार कृष्णा गजबे यांच्या अंगरक्षकाने त्यांच्याच जनसंपर्क कार्यालयाच्या प्रवेशद्वारावर आज सकाळी सव्वा सहा वाजताच्या सुमारास रिव्हॉल्वरमधून स्वत:वर गोळी झाडून आत्महत्या केली.

भास्कर चौके असे ३५ वर्षीय अंगरक्षकाचे नाव असून आज सकाळी जनसंपर्क कार्यासयाच्या प्रवेशद्वारासमोरच स्वत:च्या कानशिलात गोळी झाडली. बंदुकीच्या गोळीचा आवाज येताच समोरील पेट्रोलपंपावरील कर्मचाऱ्यांनी गजबे यांच्या कार्यालयाकडे धाव घेतली. व घटनेची माहिती गजबे यांनाही माहिती दिली. यानंतर गजबे लगेचच कार्यालयात पोहचले व भास्कर चौके याला ग्रामीण रुग्णालयात दाखल केले.

ग्रामीण रुग्णालयात प्रथोमपचार केल्यानंतर भास्कर चौकेला गडचिरोली येथील जिल्हा सामान्य रुग्णालयात हलविण्यात आले . मात्र गंभीर जखमी झालेल्या भास्कर चौके यांचा मृत्यू झाल्याचे डॉक्टरांनी घोषीत केलं.भास्कर चौके हा दोन वर्षांपासून तो आमदार गजबे यांचा अंगरक्षक म्हणून कार्यरत होता. पारिवारिक कलहातून त्याने आत्महत्या केल्याचे बोललं जात आहे.