मोफत धान्याचा काळाबाजार करणारे रॅकेट पुन्हा सक्रिय; नागपूरात पाच जणांना अटक

नागपूर : शासनाकडून गरिबांना देण्यात येणारे स्वस्त आणि मोफत धान्य खरेदी करून ते बाजारात दुप्पट किमतीने विक्री करणारे रॅकेट पुन्हा सक्रिय असल्याचे आढळले. पोलिसांनी सापळा रचून सद्भावनानगर येथे पाच जणांना अटक केली.

अशी आहे घटना

सद्भावनानगर येथील नासुप्र मैदानाच्या बाजूला तांदूळ आणि गव्हाचा काळाबाजार चालत असल्याची माहिती पोलिसांना मिळाली. झोन तीनचे पोलिस उपायुक्त गोरख भामरे यांनी यांनी कारवाईचे निर्देश दिले. पोलिस उपनिरीक्षक जितेश आरवेल्ली यांच्या नेतृत्वात अतुल चरडे, आशिष अंबादे, राजेश बंडेकर, अन्नपुरवठा अधिकारी सुमेर चावरे, नारायण सुर्वे, ज्ञानेश कुलकर्णी यांच्या पथकाने सापळा रचला. पथक सद्भावनानगर येथे पोहोचले तेव्हा गोदामासमोर काहीजण धान्य भरत असताना आढळले. एक गाडी तिथून बाहेर पडली. या गाडीला पोलिसांनी पाठलाग करून पकडले. त्यात चार टन तांदूळ आढळला. सलीम खान यांच्या गोदामातून तांदूळ व्यापाऱ्याच्या गोदामात घेऊन जात असल्याचे चालकाने सांगितले. आणखी एका गाडीत दोन टन तांदूळ, दुसऱ्या गाडीत एक टन तांदूळ व गोदामात एक टन गहू आढळला. त्यांच्याकडे कुठलाही परवाना नव्हता. गेल्या तीन महिन्यांपासून धान्याचा काळाबाजार सुरू असल्याचे चौकशीत पुढे आले.

सलीम खान साजिद खान, सोहेल सलीम खान, मोरेश्वर नीलकंठ वानखेडे, आकाश दशरथ माकडे, शेख शब्बीर शेख शाहिद या आरोपींना पोलिसांनी ताब्यात घेतले. तीन गाड्या, सात टन धान्य असा एकून सात लाख रुपयांचा मुद्देमाल जप्त करण्यात आला. अन्नसुरक्षा कायद्यांतर्गत गुन्हा दाखल करण्यात आला.