कुत्र्यांना पकडण्यासाठी लाच; दोघे जाळ्यात

एसीबीची कारवाई; महापालिकेत खळबळ

म.टा. प्रतिनिधी, नागपूर

टिमकी भागात भटक्या कुत्र्यांना पकडण्यासाठी चक्क १५०० रुपयांची लाच घेणारे महापालिकेचे दोन कर्मचारी बुधवारी लाचलुचपत प्रतिबंधक विभागाच्या जाळ्यात अडकले. एसीबीच्या या कारवाईमुळे महापालिकेत खळबळ उडाली आहे.

विलास श्रीराम चरडे (वय ४८) व सुरेश कृष्णराव डांगे (वय ५३) अशी अटकतील कर्मचाऱ्यांची नावे आहेत. दोघेही महापालिकेच्या गांधीबाग झोनमधील आरोग्य विभागात कंत्राटी कर्मचारी आहेत. तक्रारदार महापालिकेतच कार्यरत असून, टिमकी भागात राहातो. गत काही दिवसांपासून दादरापूल भागात बेवारस कुत्र्यांनी हैदोस घातला आहे. दोन दिवसांपूर्वी एका मुलाला कुत्र्याने चावा घेतल्याची घटना घडली. तक्रारदाराने झोन कार्यालयात तक्रार दिली. हे मोकाट कुत्रे पकडण्यासाठी विलास व सुरेश या दोघांची पथकात नियुक्ती करण्यात आली आहे. तक्रारदाराने या दोघांनाही कुत्रे पकडण्यास सांगितले. 'मागे कुत्रे पकडले तेव्हा तुम्ही आम्हाला केवळ नाश्त्याचे पैसे देऊन 'सलटविले' होते. आता मात्र २५०० रुपये द्यावे लागतील', असे म्हणत त्यांनी लाच मागितली. एवढी रक्कम देणे शक्य नसल्याचे तक्रारदाराने सांगितले. १५०० रुपये दिल्यानंतरच कुत्रे पकडू, असे दोघे तक्रारदाराला म्हणाले. तक्रारदाराने लाचलुचपत प्रतिबंधक विभागाकडे तक्रार केली. एसीबीचे अधीक्षक पी. आर. पाटील, अतिरिक्त अधीक्षक राजेश दुद्दलवार यांच्या मार्गदर्शनाखाली अधिकारी व कर्मचाऱ्यांनी टिमकी भागात सापळा रचला. लाच घेताच एसीबीच्या पथकाने दोघांना अटक केली. त्यांच्याविरुद्ध तहसील पोलिस स्टेशनमध्ये लाचलुचपत प्रतिबंधक कायद्यान्वये गुन्हा दाखल करण्यात आला.