मुख्यमंत्री फडणवीस, अहमदनगर हत्याकांड
म. टा. प्रतिनिधी, नागपूर
अहमदनगर शहरातील केडगावमध्ये निवडणुकीवरुन राजकीय पक्षाच्या पदाधिकाऱ्याच्या हत्याप्रकरणाची सीआयडीमार्फत चौकशी सुरू असून या प्रकरणासाठी ज्येष्ठ वकील उज्ज्वल निकम यांची नेमणूक करण्यात येत असल्याची माहिती मुख्यमंत्री देवेंद्र फडणवीस यांनी आज विधानसभेत दिली.
अहमदनगर महानगरपालिकेच्या केडगावमधील निवडणुकीवरून झालेल्या वादाच्या कारणावरून आरोपींनी दोन व्यक्तींच्या हत्याप्रकरणाची लक्षवेधी सूचना सुनील प्रभू यांनी उपस्थित केली होती, त्याला उत्तर देताना फडणवीस बोलत होते. या हत्या प्रकरणात दोषारोपपत्र दाखल करण्यात आले असून तपास सुरू असल्याने अतिरिक्त दोषारोपपत्र दाखल करण्यात येणार आहे तसेच सर्व संशयितांचे कॉल रेकॉर्ड्स मागविण्यात आले असून, ते पुन्हा तपासण्यात येणार आहेत तसेच या प्रकरणात ज्येष्ठ वकील उज्ज्वल निकम यांची नेमणूक करण्याबाबतचा प्रस्ताव अॅड. निकम यांनी मान्य केला असून, प्रशासकीय बाबी पूर्ण केल्या जात आहेत. या प्रकरणात ज्या अधिकाऱ्यांनी हलगर्जीपणा केला आहे अशांवर कडक कारवाई करण्यात येईल. कांदिवलीतील सचिन सावंत यांच्या हत्येप्रकरणी फडणवीस यांनी या प्रकरणात पुराव्यांच्या आधारे दोषारोप दाखल करण्यात आले आहे. पुढील तपास राज्य गुन्हे अन्वेषणमार्फत करण्याच्या सूचना देण्यात आल्या असून संशयितांचाही तपास केला जात आहे. त्यामुळे या प्रकरणात जे-जे दोषी आढळतील त्यांच्यावर कारवाई करण्यात येईल तसेच दोषींवर 'मोक्का' लागत असल्यास तोही लावला जाईल, असेही मुख्यमंत्र्यांनी स्पष्ट केले. यावेळी आमदार मंगेश कुडाळकर यांनी चर्चेत सहभाग घेतला.
......