म. टा. प्रतिनिधी, नागपूर
विधानसभा निवडणुकीसाठी बहुजन समाज पक्षाच्यावतीने येत्या गुरुवारपासून मुलाखती घेण्यात येणार असल्या तरी, पक्षाच्या बड्या नेत्यांनी विदर्भाचा दौरा करून इच्छुकांची चाचपणी सुरू केली. दरम्यान, मुलाखतीपूर्वी शहर व ग्रामीणमधील कार्यकर्त्यांचा मेळावा आयोजित करण्यात आला आहे.
प्रदेश प्रभारी रामअचल राजभर, खासदार डॉ. अशोक सिद्धार्थ, प्रदेशाध्यक्ष सुरेश साखरे, उपाध्यक्ष कृष्णा बेले, कोषाध्यक्ष दयानंद किरतकर आदी नेत्यांचा बुलडाणा, अमरावती, नागपूर जिल्ह्याचा दौरा सुरू आहे. दोन दिवसांपासून बुलडाणा व अमरावती येथे पदाधिकारी, कार्यकर्ते व इच्छुकांच्या भेटी घेतल्यानंतर आज, मंगळवारी नागपुरातील कार्यकर्त्यांचा मेळावा होणार आहे. दुपारी १२ वाजता जरीपटका पोलिस स्टेशनमागे नारा रोडवरील मातेश्वरी सभागृहात कार्यकर्ता मेळावा होईल. उद्या, बुधवारी उमरेड येथे ग्रामीणमधील कार्यकर्त्यांचा मेळावा आयोजित करण्यात आला आहे.
या नेते मंडळींसह झोन प्रभारी मंगेश ठाकरे, जितेंद्र म्हैसकर, भाऊ गोंडाणे, जितेंद्र घोडेस्वार, रूपेश बागेश्वर, प्रफुल्ल मानके, उत्तम शेवडे, किशोर कैथेले, अॅड. राजकुमार शेंडे, त्रिभुवन तिवारी, उषा बौद्ध, नरेश वासनिक, राजकुमार बोरकर, संदीप मेश्राम, महापालिकेतील पक्षनेत्या वैशाली नारनवरे प्रामुख्याने उपस्थित राहतील.
राज्यातील विधानसभेच्या सर्व २८८ जागा स्वबळावर लढण्यासाठी बसप उमेदवारांचा शोध घेत आहे. प्रदेश, जिल्हा, विधानसभा व सेक्टरनिहाय आजी-माजी पदाधिकाऱ्यांसह समाजाच्या विविध घटकांशी चर्चा करून विदर्भाच्या ६२ जागांसाठी १२ ते १४ सप्टेंबरदरम्यान मुलाखती होण्यापूर्वी इच्छुकांची चाचपणी केली जात आहे. यात कोणत्या मतदारसंघांवर अधिक लक्ष केंद्रित करावे, याचाही अंदाज घेण्यात येत आहे. विदर्भातील दौरे, मेळावे आणि मुलाखतीनंतर राज्याच्या अन्य भागातही अशीच प्रक्रिया राबवण्याचे संकेत पक्षाने दिले.
...............