बापरे! कार कापून काढावे लागले जखमींना

नागपूर : मानकापूर परिसरातील उड्डाणपुलावर झालेल्या भीषण अपघातात पाच जण गंभीर जखमी झाले. ही घटना शुक्रवारी सकाळी ८.३० वाजता घडली. हा अपघात इतका भीषण होता की एका कारमधील जखमींना कार कापून बाहेर काढावे लागले.

ममता सुनील कनाडे, सुनील कनाडे आणि विजय देशमुख सर्व (रा. मुलताई, मध्य प्रदेश) आणि दिलीप ठाकरे (वय ५०, रा. दिघोरी) आणि क्रिष्णा वानखेडे (वय ४७) अशी जखमींची नावे आहेत. ममता, सुनील व कारचालक विजय हे आपल्या एमपी-०४, सीव्ही-८५०६ क्रमांकाच्या कारने नागपूरला येत होते. तर दिलीप ठाकरे हे वेकोलित कार्यरत असून ते सिल्लेवाडा येथे कामाच्या ठिकाणी आपले सहकारी क्रिष्णा यांच्यासोबत एमएच-३१, डीके-५०५७ क्रमांकाच्या कारने जात होते. सकाळी ८.३० वाजेच्या सुमारास उपराजधानीत दमदार पाऊस सुरू होता. विजय देशमुख यांचे अचानक गाडीवरील नियंत्रण सुटले व त्यांनी मानकापूरच्या दिशेने जाणाऱ्या ठाकरे यांच्या कारला जोरदार धडक दिली. यात दोन्ही कारचा समोरचा भाग चक्काचूर झाला. ठाकरे हे कारमध्ये पूर्णपणे फसले होते. शेवटी अग्निशमन विभागाला बोलवून कार कापून त्यांना बाहेर काढावे लागले. पाच जण वेगवेगळ्या खासगी रुग्णालयांमध्ये दाखल असून त्यांच्यावर उपचार सुरू आहेत. यातील चौघांची प्रकृती चिंताजनक असल्याचे समजते.