नागपूर स्थानकावरही पाहणी
म.टा. विशेष प्रतिनिधी, नागपूर
दक्षिण पूर्व मध्य रेल्वेच्या नागपूर विभागात येणाऱ्या नैनपूर येथील एका बड्या रेल्वे अधिकाऱ्यावर केंद्रीय गुन्हे अन्वेषण विभागाने (सीबीआय) शुक्रवारी सायंकाळी छापा टाकल्याने रेल्वे प्रशासनात खळबळ उडाली आहे.
नैनपूर येथे ज्या अधिकाऱ्याची चौकशी केली, ते दपूमरेमध्ये सीनियर सेक्शन इंजिनीअर आहेत. रेल्वेच्या बांधाकम विभागाचे ते प्रमुख आहेत. छिंदवाडा रेल्वेस्थानकाच्या जवळच नैनपूर रेल्वेस्थानक आहे. या स्टेशनअंतर्गत झालेल्या कामाचा दर्जा निकृष्ट असल्याची तक्रार झाली होती. त्याचप्रमाणे दोन कंत्राटदारांना देण्यात आलेली कामे निकृष्ट झाली असल्याची माहिती आहे. त्यामुळे सीबीयआने सायंकाळी नैनपूरला धडक देऊन या अधिकाऱ्याची चौकशी सुरू केली. विशेष म्हणजे रेल्वेचे दक्षता पथकही यावेळी सीबीआयच्या सोबत होते. नैनपूर रेल्वे स्थानकावरील स्टेशन मास्तरच्या केबीनमध्ये रात्री उशिरापर्यंत या अधिकाऱ्याची चौकशी सुरू होती. विशेष म्हणजे सीबीआयच्या पथकाने शुक्रवारी सकाळी नागपूर रेल्वेस्थानकावरही पाहणी केली असल्याची माहिती आहे.
गुरुवारी रेल्वेच्या दक्षता पथकाने नागपूर रेल्वे स्थानकावर आरक्षण कक्षात जाऊन आकस्मिक पाहणी केली होती. सध्या देशभरच रेल्वे तिकिटांचा काळा बाजार करणाऱ्यांवर नजर ठेवण्यात आली आहे. नागपुरातही तिकिटांचा काळा बाजार करणाऱ्यांवर यापूर्वी कारवाया झाल्या आहेत.