संपाचे WhatsApp Status ठेवणाऱ्या कर्मचाऱ्याला सीईओंनी झापले; नागपूर जिल्हा परिषद वर्तुळात चर्चा

म.टा. प्रतिनिधी, नागपूर : कर्मचाऱ्यांच्या संपकाळात एका पीएने आपल्या व्हॉटसअ‍ॅपवर सीईओ कार्यालयाशी संबंधित स्टेटस ठेवल्याची बाब जिल्हा परिषदेच्या मुख्य कार्यकारी अधिकारी सौम्या शर्मा यांच्या लक्षात येताच त्यांनी त्याला चांगलेच फटकारले. यानंतर अशाप्रकारचे कृत्य करू नये म्हणून तंबीसुद्धा दिली. संबंधित पीएने हे स्टेटस आकसाने ठेवले होते की एका संघटनेचा महत्त्वाचा पदाधिकारी आहे म्हणून ठेवले, याची चर्चा सध्या जिल्हा परिषद वर्तुळात सुरू आहे.

असा आहे प्रकार

माहितीनुसार, संबंधित पीएकडे महत्त्वाची जबाबदारी आहे. जिल्हा परिषद कर्मचाऱ्यांचा संप सुरू झाल्यावर दुसऱ्याच दिवशी त्याने आपल्या व्हॉटसअ‍ॅप स्टेटसवर एका वृत्तपत्राच्या बातमीचे कात्रण ठेवले. ते काहीसे वादग्रस्त होते. ही बाब दैनंदिन कामादरम्यान सीईओंच्या लक्षात येताच त्यांनी या पीएला बोलावून हे स्टेटस कशासाठी ठेवले, याचा जाब विचारला. परंतु, कुठलेही उत्तर संबंधित पीए देऊ शकले नाही. आपण केलेले कृत्य अशोभनीय आहे.


यापुढे अशी बाब खपवून घेतली जाणार नाही. हे स्टेटस तातडीने हटविण्याचे सक्तीचे निर्देश सीईओंनी दिले. या पीएनेही आपली चूक झाल्याचे मान्य करीत काही क्षणात व्हॉटसअॅपवरील स्टेटस हटविले. परंतु, तोपर्यंत अन्य कर्मचाऱ्यांतही या पीएच्या स्टेटसची चर्चा जिल्हा परिषदेत रंगली होती.