-महिला व बाल कल्याण, रस्ते विकास, दिव्यांगांवर दिला विशेष भर
म.टा. वृत्तसेवा, चंद्रपूर
महापालिकेचे स्थायी समिती सभापती राहुल पावडे यांनी मंगळवारी विशेष सभेत वर्ष २०१७-१८चा सुधारीत व २०१८-१९चा मुळ अर्थसंकल्प सादर केला. यात महिला व बाल कल्याण विकास, रस्ते विकास तथा दिव्यांगांवर विशेष भर दिला गेला आहे. या विशेष अर्थसंकल्पीय सभेमध्ये मनपाचा ४३१.६६ कोटींचा अर्थसंकल्प सादर होताच विरोधकांनी 'बोगस अर्थसंकल्प' म्हणत सभेत गोंधळ घातला.
मनपाचा महसूल वाढविण्याच्या उद्देशाने संपत्ती कर व अन्य कर मिळून एकूण ४०.५१ कोटी रुपये मिळणार असल्याचा अंदाज वर्तविला गेला. गुंठेवारी अधिनियम अंतर्गत प्राप्त अर्जांचा निपटारा करण्याच्या माध्यमाने २०१८-१९मध्ये दोन कोटी रुपयांचा महसूल अपेक्षित आहे. राज्य शासनाकडून २०१८-१९मध्ये सुमारे २० कोटी रुपयांचे वेतन सहाय्यक अनुदान म्हणून प्राप्त होणे अपेक्षित आहे. एलबीटी व जीएसटी सहाय्यक अनुदानात १० टक्के वाढवून सुमारे ५८ कोटी रुपये अनुदान अपेक्षित आहे. नगर रचना विभागाच्या माध्यमाने शहरातील विविध निर्माण कार्यांना परवानगी प्रदान करणे व विकास शुल्क यापासून चार कोटी रुपयांचा महसूल उपेक्षित आहे. विशेष अर्थसंकल्प सभेमध्ये विरोधकांनी 'बोगस अर्थसंकल्प' म्हणत सभेत हंगामा केला.