बाबा सैलानी दर्गाह प्रकरणी आरोप निश्चिती

एटीएसने केली होती कारवाई

म.टा. प्रतिनिधी, नागपूर

औरंगाबाद आणि बुलढाण्यातील चिखली येथील बाबा सैलानी दर्गाह येथे दहशतवादी पथकाने कारवाई करून सिमी आणि इंडियन मुजाहिदीनच्या कथित दहशतवाद्यांना अटक केली होती. या प्रकरणी अकोला येथील विशेष न्यायालयात दोषारोप निश्चिती करण्यात आली आहे. या प्रकरणातील सर्व आरोपींवर दहशतवादी असल्याचा आरोप ठेवण्यात आला असून त्यांच्यावर बेकायदेशीर कृत्य प्रतिबंधक कायद्याच्या विविध कलमान्वये गुन्हे दाखल करण्यात आले आहेत.

या कारवाई दरम्यान औरंगाबाद येथून इंडियन मुजाहिद्दिनचा कथित दहशतवादी अकील खिल्जी, जफर हुसैन कुरेशी, मोहम्मद अब्रार खान ऊर्फ मुन्ना आणि शाकेर ऊर्फ खलील खिल्जी यांना अटक करण्यात आली होती. पुढे अन्वर हुसैन खत्रीला मध्य प्रदेशातून अटक करण्यात आली. या सर्वांविरुद्ध विविध हे कथित दहशतवादी सैलानी गावात मुक्कामास असल्याच्या गुप्त माहितीवरून एटीएसचे पोलिस अधीक्षक नवीन रेड्डी यांच्या नेतृत्वातील पथकाने छापामार कारवाई केली होती. परंतु, याच गुन्ह्यात हवे असलेले अमान आणि सलिक हे गेल्या चार वर्षांपासून फरार होते. पुढे अमानला अटक केल्यानंतर आता फक्त मोहम्मद सलिक या गुन्ह्यात फरार असून महाराष्ट्र एटीएस त्याचा कसून शोध घेत आहे.

व्हीसीद्वारे दोषारोप निश्चिती

या प्रकरणी खटला दाखल करण्यात आला असून अकोला येथील न्यायालयात दोषारोप निश्चिती करण्यात आली. या प्रकरणातील आरोपी अकिल खिल्जी हा भोपाळ येथील जेल तोडून पळाला होता. गेल्या वर्षी पोलिसांसोबत झालेल्या चकमकी दरम्यान तो ठार झाला. अन्वर खत्री, जफर कुरैशी आणि अमान हे सध्या मध्यवर्ती कारागृहातच आहे. याखेरीज अब्रारवर गुजरात साखळी बॉम्बस्फोट प्रकरणीसुद्धा गुन्हे दाखल करण्यात आले होते. तो सध्या साबरमती येथील कारागृहात आहे. तसेच अकिलचा मुलगा शाकेर खिल्जी हा सध्या औरंगाबाद येथील कारागृहात आहे. या सुनावणी दरम्यान अन्वर, जफर आणि अमान यांची न्यायालयात पेशी करण्यात आली. तर अब्रार आणि शाकेर यांच्यावर व्हीडीओ कॉन्फरन्सिगद्वारे दोषारोप निश्चिती करण्यात आली, अशी माहिती विशेष सरकारी वकील पी.के. सत्यनाथन यांनी दिली.